សារព័ត៌មាន N12របស់អ៊ីស្រាអែល បានរាយការណ៍ថា ក្រុមបាតុកររាប់រយនាក់ រួមទាំងក្រុមគ្រួសារចំណាប់ខ្មាំងដែលនៅតែត្រូវបានជាប់ឃុំនៅដែនដីហ្កាហ្សា បានប្រមូលផ្តុំគ្នានៅទីក្រុង Tel Aviv កាលពីយប់ថ្ងៃពុធសប្ដាហ៍នេះ ដើម្បីតវ៉ាប្រឆាំងនឹងផែនការរបស់អ៊ីស្រាអែល ក្នុងការពង្រីកសង្រ្គាម និងដណ្តើមកាន់កាប់តំបន់ហ្កាហ្សាទាំងស្រុង។

ក្រុមបាតុករបានដើរក្បួនក្នុងទីក្រុងនេះ ហើយឆ្លងកាត់ច្រកទ្វារនៃបរិវេណយោធា Kirya ក្នុងទីក្រុង Tel Aviv។ ពួកគេបានអំពាវនាវឱ្យបញ្ឈប់ការពង្រីកប្រតិបត្តិការរបស់កងទ័ពការពារអ៊ីស្រាអែល IDF នៅក្នុងតំបន់ហ្កាហ្សា ដែលពួកគេបាននិយាយថានឹងធ្វើឱ្យជីវិតរបស់ចំណាប់ខ្មាំងក្នុងដៃក្រុមហាម៉ាសស្ថិតក្នុងហានិភ័យ។  

ក្នុងអំឡុងពេលបាតុកម្ម ការប៉ះទង្គិចបានផ្ទុះឡើងជាមួយនគរបាលអ៊ីស្រាអែល ហើយឳពុករបស់ចំណាប់ខ្មាំងម្នាក់ត្រូវបាននាំចេញពីកន្លែងតវ៉ា។

យោងតាមសារព័ត៌មាន N12 ដដែល ការតវ៉ាក៏ត្រូវបានចូលរួមដោយអតីតចំណាប់ខ្មាំងឈ្មោះ Yocheved Lifshitz និងម្នាក់ទៀត ឈ្មោះ Ohad Ben-Ami ដែលបានអំពាវនាវឱ្យបន្តការចរចារសម្រាប់កិច្ចព្រមព្រៀងនាំយកចំណាប់ខ្មាំងត្រឡប់មកវិញផងដែរ។

ក្រុមអ្នកតវ៉ាបានព្រមានថា ការកាន់កាប់តំបន់ហ្កាហ្សាស្ទ្រីប អាចនាំឲ្យបាត់បង់ជីវិតមនុស្សជាទីស្រឡាញ់របស់ពួកគេ។

ក្រុមអ្នកតវ៉ាអ៊ីស្រាអែលបានបិទផ្លូវធំមួយក្នុងទីក្រុង Tel Aviv កាលពីថ្ងៃអង្គារ ៥ សីហា ខណៈពួកគេបានអំពាវនាវឱ្យរដ្ឋាភិបាលជួយសម្រួលដល់កិច្ចព្រមព្រៀងចំណាប់ខ្មាំង និងដើម្បីបញ្ចប់សង្រ្គាម      ហ្កាហ្សា ។ការប៉ះទង្គិចគ្នាបានផ្ទុះឡើងរវាងក្រុមមន្ត្រីនគរបាល និងក្រុមបាតុករ នៅពេលកងកម្លាំងបានចាប់ផ្តើមនាំអ្នកដែលបិទផ្លូវចេញ ដោយដាក់ស្លាកថា ការតវ៉ាខុសច្បាប់៕