បន្ទាប់ពីសង្គ្រាមជិតពីរឆ្នាំនៅដែនដីហ្កាហ្សា សមត្ថភាពយោធារបស់ក្រុមហាម៉ាស បានចុះខ្សោយយ៉ាងខ្លាំង ហើយការដឹកនាំផ្នែកនយោបាយរបស់ខ្លួនស្ថិតនៅក្រោមសម្ពាធដ៏ធំ។ យ៉ាងណាមិញ សារព័ត៌មាន BBC បានរាយការណ៍កាលពីថ្ងៃពុធ (០៦ សីហា) ថា ពេញមួយសង្រ្គាមមកទល់ពេលនេះ ក្រុមហាម៉ាស នៅតែមានសម្ថភាពបន្តប្រើប្រាស់ប្រព័ន្ធទូទាត់សាច់ប្រាក់សម្ងាត់ ដើម្បីបើកប្រាក់បៀវត្សរ៍ដល់មន្ត្រីចំនួន ៣០.០០០នាក់របស់ខ្លួន ដែលសរុបជាទឹកប្រាក់ចំនួន ៧លានដុល្លារ។

BBC បានសម្ភាសន៍មន្ត្រីហាម៉ាស ៣នាក់ដែលបានបញ្ជាក់ថា ពួកគេទទួលបានប្រាក់ខែជិត ៣០០ ដុល្លារក្នុងម្នាក់ៗ កាលពីសប្តាហ៍មុន។ អ្នកទាំងនោះត្រូវបានគេជឿថាស្ថិតក្នុងចំណោមបុគ្គលិករាប់ម៉ឺននាក់ ដែលបន្តទទួលបានប្រាក់ខែអតិបរមាត្រឹមតែជាង ២០% ប៉ុណ្ណោះនៃប្រាក់ខែមុនសង្គ្រាមរបស់ពួកគេ រៀងរាល់ ១០សប្តាហ៍ម្ដង។

ដោយគ្មានប្រព័ន្ធធនាគារណាដែលអាចដំណើរការបាននៅហ្កាហ្សា ការទទួលប្រាក់ខែមានភាពស្មុគស្មាញ ហើយជួនកាលក៏មានគ្រោះថ្នាក់ផងដែរ។ BBC បានលាតត្រដាងប្រព័ន្ធបើកប្រាក់ខែសម្ងាត់នោះថា បុគ្គលិកហាម៉ាស ចាប់ពីមន្រ្តីនគរបាល រហូតដល់មន្ត្រីពន្ធដារ តែងទទួលបានសារកូដអ៊ិនគ្រីបលើទូរសព្ទរបស់ពួកគេផ្ទាល់ ឬសាច់ញាតិ ណែនាំពួកគេឱ្យទៅទីតាំងជាក់លាក់មួយនៅពេលវេលាជាក់លាក់មួយដើម្បី "ជួបមិត្តផឹកតែ"។

សេចក្ដីរាយការណ៍បន្តថា នៅចំណុចជួបគ្នានោះ តែងមានបុរសម្នាក់ ឬម្តងម្កាលជាស្រ្តី ដើរទៅជិតបុគ្គលិកនោះ រួចប្រគល់ស្រោមសំបុត្របិទជិតមួយមានប្រាក់នៅខាងក្នុង ហើយក៏ទៅបាត់ដោយមិនបន្សល់ទុកទំនាក់ទំនងអ្វីឡើយ។ បុគ្គលិកម្នាក់នៅអាជ្ញាធរកិច្ចការសាសនារបស់ក្រុមហាម៉ាស ដែលសុំមិនបញ្ចេញឈ្មោះ បានពិពណ៌នាអំពីគ្រោះថ្នាក់ខ្លាំងពាក់ព័ន្ធនឹងការទៅយកប្រាក់ឈ្នួលបែបនេះ៕