កូរ៉េខាងជើង៖ ប្រទេសកូរ៉េខាងជើងនៅថ្ងៃសៅរ៍នេះបាននិយាយថា ខ្លួនបានបាញ់សាកល្បងមីស៊ីលចេញពីរថភ្លើង ជាអ្វីដែលត្រូវបានគេមើលឃើញថា ជាការសងសឹកជាក់ស្តែងប្រឆាំងទៅនឹងការដាក់ទណ្ឌកម្មថ្មី ដែលបានដាក់ដោយរដ្ឋបាលលោក Joe Biden។ ការរាយការណ៍របស់ប្រព័ន្ធផ្សព្វផ្សាយរដ្ឋកូរ៉េខាងជើងធ្វើឡើងមួយថ្ងៃ បន្ទាប់ពីយោធាប្រទេសកូរ៉េខាងត្បូងបាននិយាយថា ខ្លួនបានរកឃើញថា កូរ៉េខាងជើងបានបាញ់មីស៊ីល ២គ្រាប់ចូលទៅក្នុងសមុទ្រក្នុងការបាញ់អាវុធ ៣លើករបស់ប្រទេសកូរ៉េខាងជើងក្នុងខែនេះ។
ការបាញ់នេះបានធ្វើឡើងប៉ុន្មានម៉ោង បន្ទាប់ពីក្រសួងការបរទេសរបស់ទីក្រុងព្យុងយ៉ាងបានចេញសេចក្តីថ្លែងការណ៍ ដាក់កំហុសលើសហរដ្ឋអាមេរិកចំពោះការដាក់ទណ្ឌកម្មថ្មី លើការសាកល្បងកាលពីពេលមុនរបស់កូរ៉េខាងជើង ហើយបានព្រមានពីសកម្មភាពកាន់តែខ្លាំង។ ទីភ្នាក់ងារសារព័ត៌មានកណ្តាលកូរ៉េ (KCNA) របស់កូរ៉េខាងជើងបានរាយការណ៍ថា សមយុទ្ធបាញ់មីស៊ីលសម្រាប់ការពិនិត្យ និងវិនិច្ឆ័យភាពស្ទាត់ជំនាញក្នុងសកម្មភាពរបស់កងវរសេនាធំបាញ់មីស៊ីល បាញ់ពីចេញពីរថភ្លើងនៅខេត្ត Phyongan ខាងជើងបានធ្វើឡើងកាលពីថ្ងៃសុក្រ។ សមយុទ្ធនេះមានគោលបំណងពិនិត្យមើលស្ថានភាពប្រុងប្រយ័ត្ន របស់ក្រុមកងកម្លាំងរបស់កងវរសេនាធំ និងពង្រឹងសមត្ថភាពរបស់ពួកគេក្នុងបេសកកម្ម។ ទីភ្នាក់ងារព័ត៌មាន KCNA បាន និយាយថា ការបាញ់នេះត្រូវបានត្រួតពិនិត្យដោយមន្ត្រីទីបញ្ជាការនៃកងទ័ពប្រជាជនកូរ៉េ និងមន្ត្រីជាន់ខ្ពស់នៃបណ្ឌិត្យសភាវិទ្យាសាស្ត្រការពារជាតិ។
ព័ត៌មាន KCNA រាយការណ៍ថា កងវរសេនាធំបានទទួលបេសកកម្មដោយការជូនដំណឹងភ្លាមៗ ពីនាយសេនាធិការនៅព្រឹកថ្ងៃសុក្រមុនពេលទៅកាន់ទីតាំងបាញ់មីស៊ីល ហើយបានបាញ់ចំគោលដៅដែលបានកំណត់នៅសមុទ្រខាងកើត របស់ប្រទេសកូរ៉េជាមួយនឹងមីស៊ីលនាំមុខនៃយុទ្ធសាស្ត្រចំនួនពីរគ្រាប់។ យោងតាមការរាយការណ៍បានឱ្យដឹងថា មន្ត្រីយោធាបានពិភាក្សាអំពីការបង្កើតប្រព័ន្ធប្រតិបត្តិការ មីស៊ីលបាញ់ពីរថភ្លើងនៅទូទាំងប្រទេស និងស្វែងរកមធ្យោបាយសម្រាប់ការបំពេញបន្ថែម នូវវិធីសាស្ត្រប្រយុទ្ធរបស់ប្រទេសកូរ៉េខាងជើងដោយប្រើមីស៊ីលបាញ់ពីចេញរថភ្លើង៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
