ប្រធានាធិបតីអាមេរិក លោក Donald Trump កាលពីថ្ងៃពុធ (៧ សីហា) បាននិយាយបង្ហើបថា លោកអាចប្រើឆ្មាំជាតិដើម្បីគ្រប់គ្រងតាមដងផ្លូវនៃទីក្រុងវ៉ាស៊ីនតោនឌីស៊ី ក្នុងការគំរាមកំហែងដ៏ធំចុងក្រោយបំផុតរបស់លោកក្នុងការកាន់កាប់ទីក្រុងដែលបម្រើជាអាសនៈរបស់រដ្ឋាភិបាលអាមេរិកមួយនេះ។

លោក Trump បានអ្នកយកព័ត៌មាននៅឯសេតវិមានថា "អាមេរិកមានរដ្ឋធានីដែលពុំមានសុវត្ថិភាពខ្លាំងណាស់ ដូច្នេះត្រូវតែគ្រប់គ្រងឌីស៊ី ហើយនេះប្រហែលជាកន្លែងគ្រប់គ្រងល្អបំផុតក្នុងប្រទេស"។ លោក Trump ដែលធ្លាប់គំរាមដណ្ដើមការគ្រប់គ្រងពីសហព័ន្ធនៃទីក្រុងនេះជាច្រើនដង បានជំរុញការគំរាមកំហែងទាំងនោះ បន្ទាប់ពីបុគ្គលិកម្នាក់ដែលធ្លាប់នៅក្រសួងប្រសិទ្ធភាពរដ្ឋាភិបាល បានរងការវាយប្រហារកាលពីចុងសប្តាហ៍មុន។

លោក Trump បង្ហោះរូបភាពជនរងគ្រោះនោះលើប្រព័ន្ធផ្សព្វផ្សាយសង្គម ដោយមានឈាមប្រឡាក់ស្ទើពេញរាយកាយ។ លោកនិយាយថា៖ អត្រាឧក្រិដ្ឋកម្ម ការកាប់សម្លាប់ និងអ្វីៗផ្សេងទៀតមានខ្ពស់ណាស់នៅវ៉ាស៊ីនតោន លោកនឹងមិនអនុញ្ញាតឱ្យកើតឡើងទៀតទេ ហើយនោះរួមបញ្ចូលទាំងការនាំយកកងឆ្មាំជាតិទៅទីនោះ។

ឧក្រិដ្ឋកម្មហិង្សាក្នុងពេល ៧ខែដំបូងនៃឆ្នាំ២០២៥នេះ បានធ្លាក់ចុះ ២៦% នៅវ៉ាស៊ីនតោន បើធៀបនឹងឆ្នាំមុន ខណៈឧក្រិដ្ឋកម្មទូទាំងប្រទេសធ្លាក់ចុះប្រហែល ៧% នេះបើយោងតាមកំណត់ត្រានាយកដ្ឋាននគរបាលអាមេរិក។

ទីក្រុងវ៉ាស៊ីនតោន ត្រូវបង្កើតឡើងក្នុងឆ្នាំ១៧៩០ ដោយរួមបញ្ជូលដីពីរដ្ឋ Virginia និង Maryland ដែលនៅជិតខាង។ សភាគ្រប់គ្រងលើថវិការបស់វ៉ាស៊ីនតោន ប៉ុន្តែពលរដ្ឋជាអ្នកជ្រើសរើសអភិបាលក្រុង និងក្រុមប្រឹក្សាក្រុង ដោយសារច្បាប់ដែលគេស្គាល់ថា ច្បាប់គ្រប់គ្រងផ្ទះ (Home Rule Act)។ ដើម្បីឱ្យលោក Trump កាន់កាប់ទីក្រុងនេះបាន សភាទំនងជានឹងត្រូវអនុម័តច្បាប់ថ្មីលុបចោលច្បាប់គ្រប់គ្រងផ្ទះនោះ បន្ទាប់មកលោក Trump នឹងត្រូវចុះហត្ថលេខាឱ្យក្លាយជាច្បាប់ពេញលេញ៕