អ្នកជំងឺអាសន្នរោគជនជាតិស៊ូដង់ ដែលបានភៀសខ្លួនរួចហើយដោយសារសង្គ្រាម បានមកពេញនៅគ្លីនិកបណ្ដោះអាសន្នគ្រប់គ្រងដោយអង្គការសហប្រជាជាតិនៅជំរំជនភៀសខ្លួន Tawila នៅទីក្រុង Darfur ភាគខាងជើង។ រដូវវស្សា រួមជាមួយស្ថានភាពរស់នៅខ្សោយនិងអនាម័យមិនគ្រប់គ្រាន់ បាននាំឱ្យមានការផ្ទុះឡើងជំងឺអាសន្នរោគ។ អ្នកជំងឺឈ្មោះ Mohila Ibrahim បានស្នាក់នៅគ្លីនីករយៈពេល៤ថ្ងៃ ដោយមានអាការៈវិលមុខ និងរាគ។

អ្នកនាំពាក្យបានប្រាប់សារព័ត៌មានរ៉យទ័រថា ចាប់តាំងពីពាក់កណ្តាលខែមិថុនាមក ក្រុមជំនួយ Medecins Sans Frontieres ព្យាបាលជាសះស្បើយបានចំនួន២.៥០០ករណី។ យោងតាមក្រុមតស៊ូមតិដែលធ្វើប្រតិបត្តិការនៅទូទាំងទីក្រុង Darfur បានឲ្យដឹងថា មនុស្ស៥២នាក់បានស្លាប់។

វ៉ាក់សាំងដែលត្រូវការដើម្បីទប់ស្កាត់ការរាលដាល ប្រសិនបើត្រូវបានផ្តល់ឲ្យនឹងត្រូវការពេលវេលាច្រើនដើម្បីទៅដល់ ដោយសារតែមានភ្លៀងធ្លាក់។

ពេលនេះជំរំ Tawila កំពុងទទួលប្រជាជនភៀសខ្លួនកន្លះលាននាក់ បន្ទាប់ពីកងកម្លាំងគាំទ្ររហ័សយោធាប៉ារ៉ានៅប្រទេសស៊ូដង់ បានបង្កើនការវាយលុករបស់ខ្លួនទៅលើទីក្រុង al-Fashir ដែលនៅក្បែរនោះ និងបានវាយប្រហារលើជំរំជនភៀសខ្លួនដ៏ធំមួយកន្លែង។ ការវាយតម្លៃនាពេលថ្មីៗនេះ បានរកឃើញថា មានមនុស្សតែ១០% ប៉ុណ្ណោះនៅក្នុងជំរំ អាចទទួលបានទឹក និងបង្គន់អនាម័យ។

គ្រួសារភាគច្រើនរាយការណ៍ថា បានទទួលទានអាហារតែមួយពេលប៉ុណ្ណោះក្នុងមួយថ្ងៃ ឬស្ទើរតែគ្មាន។