ទូរទស្សន៍រដ្ឋ បាននិយាយនៅថ្ងៃព្រហស្បតិ៍ (៨ សីហា) នេះថា លោក ម្យិន ស្វេ (Myint Swe) -- ដែលបានក្លាយជាប្រធានាធិបតីរបស់សហភាពមីយ៉ាន់ម៉ា អំឡុងពេលធ្វើរដ្ឋប្រហារឆ្នាំ២០២១ ប្រឆាំងនឹងរដ្ឋាភិបាលស៊ីវិលជាប់ឆ្នោត ហើយបានប្រគល់អំណាចឱ្យយោធាភ្លាមៗនៅពេលនោះ -- បានទទួលមរណភាពហើយ រយៈពេលមួយឆ្នាំបន្ទាប់ពីសម្រាកព្យាបាលជំងឺនៅមន្ទីរពេទ្យ។

ទូរទស្សន៍រដ្ឋ MRTV បាននិយាយថា អតីតឧត្តមសេនីយ៍វ័យ ៧៤ឆ្នាំរូបនេះទទួលមរណភាពនៅមន្ទីរពេទ្យណៃពិដោរ នៅព្រឹកថ្ងៃព្រហស្បតិ៍ (ពេលវេលាក្នុងស្រុក)។ លោក Myint Swe បានក្លាយជាប្រធានាធិបតីមានតែឈ្មោះប៉ុណ្ណោះ បន្ទាប់ពីអ្នកកាន់តំណែងមុនរបស់លោកត្រូវចាប់ខ្លួនអំឡុងរដ្ឋប្រហារ។

លោក Myint Swe ធ្លាប់ធ្វើជាអនុប្រធានាធិបតីនៅក្រោមរបបស៊ីវិលរបស់មីយ៉ាន់ម៉ា មុនពេលក្លាយជាប្រធានាធិបតីមានតែឈ្មោះនេះ។ ទោះបែបនេះក៏ដោយ របបសឹកបានពឹងផ្អែកលើលោកក្នុងការចុះហត្ថលេខាលើក្រឹត្យ និងផ្តល់នូវភាពស្របច្បាប់នៃការគ្រប់គ្រងរបស់ខ្លួន។

សេចក្តីថ្លែងការណ៍ដាច់ដោយឡែកពីការិយាល័យព័ត៌មានយោធាបាននិយាយថា ពិធីបុណ្យសពរបស់លោកនឹងធ្វើឡើងនៅកម្រិតរដ្ឋ ប៉ុន្តែកាលបរិច្ឆេទមិនត្រូវបានបង្ហាញឱ្យដឹងនោះទេ។

ប្រព័ន្ធផ្សព្វផ្សាយរដ្ឋធ្លាប់ប្រកាសកាលពីខែកក្កដា ឆ្នាំមុនថា លោក Myint Swe មានជំងឺសរសៃប្រសាទដើរខុសប្រក្រតី និងជំងឺសរសៃប្រសាទនៅខុសទីតាំងក្នុងខួរក្បាលនិងខួរឆ្អឹងខ្នង ដែលធ្វើឱ្យលោកមិនអាចធ្វើសកម្មភាពប្រចាំថ្ងៃធម្មតាបាន រួមទាំងការហូបចុកផងដែរ។ ប៉ុន្មានថ្ងៃក្រោយមកនៅពេលនោះ លោកក៏ចូលសម្រាកព្យាបាលនៅមន្ទីរពេទ្យ ហើយភារកិច្ចរបស់លោកទាំងអស់ត្រូវប្រគល់ឱ្យប្រមុខរបបសឹក និងជាមេបញ្ជាការកងកម្លាំងប្រដាប់អាវុធ លោក Min Aung Hlaing ចាប់តាំងពីពេលនោះមក៕