ប្រទេសស៊ីរី បានចុះហត្ថលេខាលើអនុស្សរណៈនៃការវិនិយោគទុនជាបន្តបន្ទាប់ ដែលមានតម្លៃសរុប ១៤ ពាន់លានដុល្លារ ជាមួយក្រុមហ៊ុនបរទេសមួយចំនួន កាលពីថ្ងៃពុធ។ នេះបើយោងតាមទីភ្នាក់ងារសារព័ត៌មានរដ្ឋ SANA ។

កិច្ចព្រមព្រៀងនេះ គ្របដណ្តប់លើគម្រោងចំនួន ១២ នៅទូទាំងប្រទេសស៊ីរី រួមទាំងហេដ្ឋារចនាសម្ព័ន្ធ ការដឹកជញ្ជូន និងការអភិវឌ្ឍពាណិជ្ជកម្ម។ ពិធីចុះហត្ថលេខាមួយ ត្រូវបានធ្វើឡើង ក្នុងទីក្រុងដាម៉ាស ហើយមានការចូលរួមដោយមេដឹកនាំបណ្តោះអាសន្នស៊ីរីលោក Ahmad al-Sharaa។

លោក Talal al-Hilali ប្រធានអាជ្ញាធរវិនិយោគស៊ីរី បាននិយាយនៅក្នុងពិធីនោះថា ការចុះហត្ថលេខាលើកិច្ចព្រមព្រៀងនេះ គឺជា «ការប្រកាសថា ប្រទេសស៊ីរីបើកចំហសម្រាប់ការវិនិយោគ»។

លោក Al-Hilali បាននិយាយថា គម្រោងទាំងនោះ រួមមាន ការអភិវឌ្ឍឡើងវិញនូវអាកាសយានដ្ឋានអន្តរជាតិ Damascus ជាមួយនឹងការវិនិយោគនូវទឹកប្រាក់ ៤ពាន់លានដុល្លារ ការសាងសង់ប្រព័ន្ធរថភ្លើងក្រោមដី នៅទីក្រុងដាម៉ាស ដែលមានទឹកប្រាក់ ២ ពាន់លានដុល្លារ និងគម្រោង Damascus Towers ដែលមានតម្លៃ ២ ពាន់លានដុល្លារផងដែរ។

ការអភិវឌ្ឍបន្ថែមរួមមាន គម្រោង Baramkeh Towers ដែលត្រូវចំណាយទឹកប្រាក់ ៥០០លានដុល្លារ និងគម្រោងផ្សារទំនើប Baramkeh Mall មានតម្លៃ ៦០ លានដុល្លារ។