អ្នកនាំពាក្យស្ថានទូតចិនលោក Liu Pengyu បានប្រាប់ទីភ្នាក់ងារសារព័ត៌មាន TASS ក្នុងការឆ្លើយតបទៅនឹងពន្ធនាំចូលថ្មីដ៏មានសក្តានុពលរបស់សហរដ្ឋអាមេរិក ដែលកំណត់គោលដៅទៅលើប្រទេសចិនជុំវិញទំនាក់ទំនងពាណិជ្ជកម្មរបស់ខ្លួនជាមួយរុស្ស៊ីថា កិច្ចសហប្រតិបត្តិការរបស់ចិនជាមួយរុស្ស៊ី គឺសមហេតុផល និងស្របច្បាប់ ក៏ដូចជាសមនឹងទទួលបានការគោរព និងការការពារ។

លោក Liu បាននិយាយថា៖«សហគមន៍អន្តរជាតិ រួមទាំងប្រទេសចិន បានអនុវត្តកិច្ចសហប្រតិបត្តិការធម្មតាជាមួយរុស្ស៊ី ក្នុងក្របខ័ណ្ឌនៃច្បាប់អន្តរជាតិ។ កិច្ចសហប្រតិបត្តិការនេះ គឺសមហេតុផល និងស្របច្បាប់ ដោយមិនបង្កគ្រោះថ្នាក់ដល់ភាគីទី៣ ណាមួយឡើយ ហើយសមនឹងទទួលបានការគោរព និងការការពារ ។«ប្រទេសចិនតែងតែប្រឆាំងយ៉ាងម៉ឺងម៉ាត់ចំពោះការដាក់ទណ្ឌកម្មឯកតោភាគីដែលខុសច្បាប់ និងអយុត្តិធម៌ ហើយគេហៅថា យុត្តាធិការជាក់លាក់របស់សហរដ្ឋអាមេរិក។ សង្គ្រាមពន្ធគយ គ្មានអ្នកឈ្នះទេ។ ការបង្ខិតបង្ខំ និងការគាបសង្កត់ នឹងមិនទទួលបានជោគជ័យទេ។

លោក Liu បានកត់សម្គាល់ឃើញថា៖ នាពេលថ្មីៗនេះ ប្រទេសចិន និងសហរដ្ឋអាមេរិក បានរៀបចំកិច្ចចរចាសេដ្ឋកិច្ច និងពាណិជ្ជកម្មចិន-អាមេរិក ចុងក្រោយគេ នៅទីក្រុង Stockholm នៃប្រទេសស៊ុយអែត ដែលភាគីទាំងពីរ «បានពិនិត្យ និងបញ្ជាក់អំពីការអនុវត្តកិច្ចព្រមដែលសម្រេចបាននៅក្នុងកិច្ចចរចាសេដ្ឋកិច្ច និងពាណិជ្ជកម្ម នៅទីក្រុងហ្សឺណែវ ហើយក្របខ័ណ្ឌដែលបានព្រមព្រៀងគ្នា នៅក្នុងកិច្ចពិភាក្សាទីក្រុងឡុងដ៍»។

អ្នកនាំពាក្យរូបនេះបានសន្និដ្ឋានថា៖«យើងសង្ឃឹមថា សហរដ្ឋអាមេរិក អាចធ្វើការជាមួយចិន ដើម្បីបន្តប្រកាន់ខ្ជាប់នូវមតិឯកភាពសំខាន់ៗ ដែលប្រមុខរដ្ឋទាំងពីរ សម្រេចបានក្នុងអំឡុងកិច្ចពិភាក្សាតាមទូរស័ព្ទ ប្រើប្រាស់ពេញលេញនូវតួនាទីនៃយន្តការពិគ្រោះយោបល់សេដ្ឋកិច្ច និងពាណិជ្ជកម្មចិន-អាមេរិក បន្តពង្រឹងកិច្ចព្រមព្រៀង កាត់បន្ថយការយល់ច្រលំ និងពង្រឹងកិច្ចសហប្រតិបត្តិការ ពង្រឹងកិច្ចសន្ទនា និងការពិគ្រោះយោបល់ឲ្យកាន់តែស៊ីជម្រៅ និងខិតខំឲ្យទទួលបានលទ្ធផលឈ្នះ-ឈ្នះបន្ថែមទៀត»។