ប្រធានាធិបតីអាមេរិក លោក Donald Trump បាននិយាយនៅព្រឹកព្រលឹមថ្ងៃព្រហស្បតិ៍ (៧ សីហា) នេះថា "ប្រាក់ពន្ធរាប់ពាន់លានដុល្លារ" ឥឡូវនេះកំពុងហូរចូលទៅក្នុងសហរដ្ឋអាមេរិក បន្ទាប់ពីកាលបរិច្ឆេទកំណត់ថ្ងៃទី០៧ ខែសីហា របស់លោកបានចូលមកដល់ សម្រាប់ការអនុវត្តជាធរមាននូវពន្ធបដិការថ្មី។

ទៅលើវេទិកាសង្គម Truth Social ត្រឹមពាក់កណ្តាលអធ្រាត្រឈានចូលថ្ងៃទី៧ សីហា នេះ (ពេលវេលានៅសហរដ្ឋអាមេរិក) លោក Trump បានបង្ហោះសារថា "កណ្តាលយប់ហើយ!!! ប្រាក់រាប់ពាន់លានដុល្លារកំពុងហូរចូលសហរដ្ឋអាមេរិកហើយ!"។

រដ្ឋមន្រ្តីក្រសួងរតនាគារអាមេរិក លោក Scott Bessent បាននិយាយពីមុនរួចមកហើយថា រដ្ឋបាលបានព្យាករថា របាំងពន្ធគយអាចបង្កើតប្រាក់ចំណូលច្រើនជាង ៣០០ពាន់លានដុល្លារ សម្រាប់រដ្ឋាភិបាលសហព័ន្ធពេញមួយឆ្នាំ២០២៥នេះ។

អត្រាពន្ធនាំចូលខ្ពស់ៗលើប្រទេសរាប់សិបបានចាប់ផ្តើមយកនៅថ្ងៃព្រហស្បតិ៍នេះ ស្របពេលផលប៉ះពាល់សេដ្ឋកិច្ចមកពីការគំរាមកំហែងពន្ធរយៈពេលជាច្រើនខែរបស់លោក Trump បានចាប់ផ្តើមបង្កើតការខូចខាតដែលអាចមើលឃើញសម្រាប់សេដ្ឋកិច្ចសហរដ្ឋអាមេរិក។ សេតវិមានបាននិយាយថា ចាប់ពីពាក់កណ្តាលអធ្រាត្រឈានចូលថ្ងៃទី៧ សីហា នេះ ដែលទំនិញមកពីជាង ៦០ប្រទេស និងសហភាពអឺរ៉ុប នឹងប្រឈមមុខនឹងអត្រាពន្ធទូលំទូលាយយ៉ាងតិច ១០% ឬខ្ពស់ជាងនេះ៕