ក្រុមអ្នកវិទ្យាសាស្ត្រអឺរ៉ុប បាននិយាយនៅថ្ងៃព្រហស្បតិ៍ (៧ សីហា) នេះថា ខែមុននេះគឺជាខែកក្កដាដែលមានអាកាសធាតុក្តៅបំផុតទីបីរបស់ភពផែនដី ចាប់តាំងពីការកត់ត្រាបានចាប់ផ្តើម ហើយក៏រួមបញ្ចូលសីតុណ្ហភាពជាតិក្នុងកំណត់ត្រា ៥០,៥អង្សាសេ នៅប្រទេសទួរគីផងដែរ។

យោងតាមសេវាបម្រែបម្រួលអាកាសធាតុ Copernicus ហៅកាត់ថា C3S របស់សហភាពអឺរ៉ុប បានឱ្យដឹងថា សីតុណ្ហភាពខ្យល់ជាមធ្យមលើផ្ទៃផែនដីបានឡើងដល់ ១៦,៦៨អង្សាសេ ក្នុងខែកក្កដា ដែលស្មើនឹង ០,៤៥អង្សាសេ លើសពីមធ្យមភាគឆ្នាំ១៩៩១-២០២០ សម្រាប់ខែដូចគ្នានេះ។

ទោះជាខែកក្កដា ឆ្នាំ២០២៥នេះ មិនក្តៅដូចកំណត់ត្រាទីមួយនៅខែកក្កដា ឆ្នាំ២០២៣ និងក្តៅបំផុតទីពីរក្នុងខែកក្កដា ឆ្នាំ២០២៤ក៏ដោយ ក៏សីតុណ្ហភាពផ្ទៃផែនដីជាមធ្យមកាលពីខែមុននៅតែ ១,២៥អង្សាសេ លើសពីសម័យមុនឧស្សាហកម្មឆ្នាំ១៨៥០-១៩០០ នៅពេលមនុស្សចាប់ផ្តើមដុតឥន្ធនៈហ្វូស៊ីលតាមខ្នាតឧស្សាហកម្ម។

លើសពីនេះ រយៈពេល ១២ ខែ ចាប់ពីខែសីហា ឆ្នាំ២០២៤ ដល់ខែកក្កដា ឆ្នាំ២០២៥ សីតុណ្ហភាពឡើង ១,៥៣អង្សាសេ ក្តៅជាងកម្រិតមុនឧស្សាហកម្ម ដែលលើសពីបន្ទាត់ក្រហម ១,៥អង្សាសេ ក្នុងកិច្ចព្រមព្រៀងទីក្រុងប៉ារីស ដែលស្វះស្វែងទប់ស្កាត់ការឡើងកម្ដៅផែនដី ហើយបានចូលជាធរមានក្នុងឆ្នាំ២០១៦។ សូមបញ្ជាក់ជូនថា ពិភពលោកមិនទាន់បានឡើងលើសពីគោលដៅ ១,៥អង្សាសេនោះជាផ្លូវការនៅឡើយទេ ដែលសំដៅលើសីតុណ្ហភាពជាមធ្យមរបស់ពិភពលោករយៈពេលវែង ក្នុងរយៈពេលជាច្រើនទសវត្សរ៍៕