ក្រសួងយុត្តិធម៌អាមេរិកបានប្រកាសថា ទាហានសកម្មម្នាក់ត្រូវបានចោទប្រកាន់ពីបទព្យាយាមបញ្ជូនព័ត៌មានដ៏រសើបអំពីរថក្រោះប្រយុទ្ធដ៏សំខាន់របស់កងទ័ពសហរដ្ឋអាមេរិកទៅកាន់រដ្ឋាភិបាលរុស្ស៊ី។

ក្រសួងយុត្តិធម៌ បាននិយាយនៅក្នុងសេចក្តីថ្លែងការណ៍កាលពីថ្ងៃពុធថា ជនសង្ស័យ ឈ្មោះ Taylor Adam Lee ត្រូវបានចោទពីបទ «ព្យាយាមបញ្ជូនព័ត៌មានការពារជាតិទៅឱ្យសត្រូវបរទេស និងបានព្យាយាមនាំចេញទិន្នន័យបច្ចេកទេសដែលត្រូវបានគ្រប់គ្រង ដោយគ្មានការអនុញ្ញា»។

លោក Lee ជាទាហានអាយុ២២ឆ្នាំ ឈរជើងនៅ Fort Bliss ក្នុងរដ្ឋតិចសាស់ មិនទាន់បានចូលផ្តល់ចម្លើយចំពោះបទចោទប្រកាន់នៅឡើយទេ ដែលត្រូវបានប្តឹងនៅតុលាការតំបន់របស់អាមេរិកនៅរដ្ឋតិចសាស់។

លោក John A Eisenberg ជំនួយការរដ្ឋអាជ្ញារសម្រាប់សន្តិសុខជាតិបាននិយាយថា លោក Lee បានព្យាយាម «បញ្ជូនព័ត៌មានការពារជាតិដ៏រសើបទៅឲ្យប្រទេសរុស្ស៊ី» ទាក់ទងនឹងប្រតិបត្តិការរបស់រថក្រោះ M1A2 Abrams ជារថក្រោះប្រយុទ្ធដ៏សំខាន់ត្រូវបានប្រើប្រាស់ដោយកងទ័ពសហរដ្ឋអាមេរិក។

កាលពីខែមិថុនា លោក Lee ត្រូវបានគេនិយាយថាបានប្រើប្រាស់អ៊ីនធឺណិត និងបានផ្តល់ជំនួយដល់ប្រទេសរុស្ស៊ីជាថ្នូរនឹងការទទួលបានសញ្ជាតិរុស្ស៊ី។