ពលរដ្ឋប៉ាឡេស្ទីនយ៉ាងហោចណាស់២៧នាក់បានស្លាប់នៅក្នុងការវាយប្រហាររបស់អ៊ីស្រាអែល កាលពីថ្ងៃពុធ ខណៈមនុស្ស២០នាក់ផ្សេងទៀត បានស្លាប់ដោយរថយន្តដឹកស្បៀងក្រឡាប់នៅតំបន់ហ្កាហ្សាស្ទ្រីប នេះបើយោងតាមប្រភពពីប៉ាឡេស្ទីន។ លោក Mahmoud Basal អ្នកនាំពាក្យការពារជនស៊ីវិលនៅតំបន់ហ្កាហ្សា បាននិយាយថា ការវាយប្រហារបានដាក់គោលដៅទៅលើតង់លំនៅឋានជនភៀសខ្លួន និងការប្រមូលផ្តុំមនុស្សដែលរង់ចាំជំនួយនៅតំបន់ហ្កាហ្សាស្ទ្រីប។

លោក Basal បាននិយាយថា មនុស្ស៧នាក់ត្រូវបានសម្លាប់ដោយការបាញ់របស់កងទ័ពអ៊ីស្រាអែល ខណៈកំពុងរង់ចាំជំនួយនៅជិតមជ្ឈមណ្ឌលចែកចាយចំនួនពីរកន្លែងដែលគាំទ្រដោយសហរដ្ឋអាមេរិកនៅ ទីក្រុង Rafah និងនៅតំបន់ Netzarim ហើយ មនុស្ស៩នាក់ រួមទាំងកុមារត្រូវបានសម្លាប់នៅពេលដែលយន្តហោះអ៊ីស្រាអែលបានទម្លាក់គ្រាប់បែកលើលំនៅឋានពីរខ្នងនៅភាគខាងកើតទីក្រុងហ្កាហ្សា។ 

អ្នកនាំពាក្យរបស់ទីភ្នាក់ងារការពារជនស៊ីវិលគ្រប់គ្រងដោយក្រុមហាម៉ាសនៅតំបន់ហ្កាហ្សា លោក Mahmoud Basal និយាយថា មនុស្ស២០នាក់ស្លាប់ និងជាង៣០នាក់បានរងរបួសនៅពេលដែលរថយន្តដឹកជំនួយចំនួន៤គ្រឿងបានក្រឡាប់។ លោកនិយាយថា តំបន់នោះស្ថិតក្រោមការគ្រប់គ្រងរបស់យោធាអ៊ីស្រាអែល ហើយផ្លូវថ្នល់មានសភាពទ្រុឌទ្រោម និងគ្រោះថ្នាក់។