ទូរទស្សន៍ Sudan TV ផ្លូវការបានរាយការណ៍កាលពីថ្ងៃពុធថា កងកម្លាំងទ័ពអាកាសស៊ូដង់ បានបំផ្លាញយន្តហោះរបស់ប្រទេសអារ៉ាប់រួម ដែលដឹកទាហានស៊ីឈ្នួលកូឡុំប៊ី ខណៈយន្តហោះកំពុងចតនៅអាកាសយានដ្ឋានដែលគ្រប់គ្រងដោយកងកម្លាំងគាំទ្ររហ័សយោធាប៉ារ៉ា(RSF) ក្នុងទីក្រុង Darfur ភាគខាងលិចប្រទេសស៊ូដង់។

ដោយលើកឡើងពីប្រភពយោធា ទូរទស្សន៍បានរាយការណ៍ថា កងទ័ពអាកាសស៊ូដង់បានបើកការវាយប្រហារដ៏ភ្ញាក់ផ្អើលមួយទៅលើផ្លូវរត់របស់អាកាសយានដ្ឋានអន្តរជាតិ Nyala ក្នុងរដ្ឋ South Darfur កាលពីថ្ងៃពុធ។ របាយការណ៍បាននិយាយថា «ការវាយប្រហារដ៏ភ្ញាក់ផ្អើលបានដាក់គោលដៅលើក្រុមទាហានស៊ីឈ្នួលកូឡុំប៊ី នៅពេលទៅដល់តាមយន្តហោះឯកជនមួយគ្រឿងដែលត្រូវបានគេជឿថាបានហោះចេញពីមូលដ្ឋានទ័ពអាកាសមួយកន្លែងនៅឈូងសមុទ្រ» ដោយនិយាយថា «ប្រតិបត្តិការតាមអាកាស បានបណ្តាលឱ្យស្លាប់ទាហានស៊ីឈ្នួលរាប់សិបនាក់»។

សេចក្តីរាយការណ៍បានបន្ថែមថា ទាហានស៊ីឈ្នួលត្រូវបាននាំយកមកដើម្បីគាំទ្រដល់កងកម្លាំងគាំទ្ររហ័ស ជាផ្នែកមួយនៃ «ផែនការបរទេស» ក្នុងគោលបំណងធ្វើឱ្យប្រទេសស៊ូដង់មានអស្ថិរភាព និងអូសបន្លាយសង្រ្គាម។ ប្រភពបានបញ្ជាក់ថា ចារកម្មយោធារបស់កងទ័ពស៊ូដង់បាននឹងកំពុងតាមដានសកម្មភាពរបស់យន្តហោះ និងតាមដានការសម្របសម្រួលរបស់ខ្លួនជាមួយសមាជិកកងកម្លាំងគាំទ្ររហ័សដែលគ្រប់គ្រងអាកាសយានដ្ឋាន។

ប្រទេសស៊ូដង់បានចោទប្រកាន់ប្រទេសអារ៉ាប់រួម (UAE) ពីការនាំយក និងផ្តល់មូលនិធិដល់ទាហានស៊ីឈ្នួលកូឡុំប៊ី ដើម្បីប្រយុទ្ធប្រឆាំងនឹងកងទ័ព ជំនួសឲ្យកងកម្លាំងគាំទ្ររហ័ស។ ប៉ុន្តែប្រទេសអារ៉ាប់រួម បានច្រានចោលការជាប់ពាក់ព័ន្ធក្នុងការផ្តល់មូលនិធិដល់កងកម្លាំងគាំទ្ររហ័ស(RSF)។