រដ្ឋមន្ត្រីការបរទេសចិនលោក Wang Yi បានលើកឡើងថា ប្រទេសចិនគាំទ្រកិច្ចចរចាអ៊ុយក្រែន-រុស្ស៊ី ហើយជឿជាក់ថា ដំណើរការដោះស្រាយ ដើម្បីបញ្ចប់សង្រ្គាម បានឈានដល់ដំណាក់កាលដ៏សំខាន់។

ការកត់សម្គាល់របស់លោកបែបនេះ បានកើតមានកាលពីថ្ងៃពុធ (ទី៦ ខែសីហា) ជាពេលដែលលោករដ្ឋមន្ត្រីការបរទេសចិនរូបនេះ បានសន្ទនាតាមទូរសព្ទជាមួយលោក Celso Amorim ទីប្រឹក្សាពិសេសទទួលបន្ទុកកិច្ចការអន្តរជាតិរបស់ប្រធានាធិបតីប្រេស៊ីល។

អំឡុងពេលជជែកគ្នានោះ ឥស្សរជនទាំង២ បានផ្លាស់ប្តូរទស្សនៈគ្នា ជុំវិញ «វិបត្តិអ៊ុយក្រែន»។ ហើយជាមួយគ្នានេះ លោក Wang បានប្រាប់ថា ការឈានដល់ «ការព្រមព្រៀងគ្នា» រវាងប្រទេសចិន និងប៉ាគីស្ថាន បានដើរតួនាទីវិជ្ជមាន ក្នុងការកាត់បន្ថយភាពតានតឹងនៃ «វិបត្តិ» នេះ។

សេចក្តីថ្លែងការណ៍របស់ក្រសួងការបរទេសចិន បានឲ្យដឹងថា៖ «រុស្ស៊ី និងអ៊ុយក្រែនបានចាប់ផ្តើមការចរចារួចហើយ ដោយបានបោះជំហានយ៉ាងសំខាន់ឆ្ពោះទៅមុខ។ ដំណើរការដោះស្រាយវិបត្តិ នាពេលបច្ចុប្បន្ន បានឈានដល់ដំណាក់កាលដ៏សំខាន់»។

ជាចុងក្រោយ ភាគីទាំង២ ក៏បានបញ្ជាក់ពីការត្រៀមខ្លួន ក្នុងការលើកកម្ពស់បទឈប់បាញ់ ការចរចាសន្តិភាព និងជំហានផ្សេងទៀតឆ្ពោះទៅរក «ដំណោះស្រាយនយោបាយនៃវិបត្តិ» នេះ៕