អភិបាលក្រុងហ៊ីរ៉ូស៊ីម៉ារបស់ប្រទេសជប៉ុន កាលពីថ្ងៃពុធ (ទី៦ ខែសីហា) បានរិះគន់ដល់បណ្ដាប្រទេសដែលមានអាវុធនុយក្លេអ៊ែរ ខណៈដែលប្រទេសជប៉ុន បានប្រារព្ធខួបលើកទី៨០ នៃការទម្លាក់គ្រាប់បែកបរមាណូលើទីក្រុងរបស់លោក។

អំឡុងពិធីរំលឹកខួបសន្តិភាពប្រចាំឆ្នាំរបស់ជប៉ុន ដែលបានធ្វើឡើងនៅឯឧទ្យានអនុស្សាវរីយ៍សន្តិភាព ក្នុងទីក្រុងនេះ អភិបាលក្រុងហ៊ីរ៉ូស៊ីម៉ា លោក Kazumi Matsui បាននិយាយថា៖ «ទោះបីជាមានភាពចលាចលនាពេលបច្ចុប្បន្ន ជាកម្រិតជាតិ ឬរដ្ឋក៏ដោយ ក៏យើងជាប្រជាជនមិនត្រូវបោះបង់ចោលឡើយ ពោលគឺកុំអស់សង្ឃឹម។ ផ្ទុយទៅវិញ យើងត្រូវតែប្រឹងប្រែងឲ្យខ្លាំងក្លាបន្ថែមទៀត ដើម្បីបង្កើតបានការឯកភាពសង្គមស៊ីវិល ដែលយល់ឃើញដូចគ្នាថា អាវុធនុយក្លេអែរត្រូវតែត្រូវបានលុបបំបាត់ ដើម្បីឲ្យមានពិភពលោកមួយពេញទៅដោយសន្តិភាពយ៉ាងពិតប្រាកដ»។

មនុស្សប្រមាណ ៥៥.០០០នាក់ បានចូលរួមក្នុងព្រឹត្តិការណ៍នេះ ដែលរួមមានតំណាងមកពីប្រទេស និងតំបន់ចំនួន ១២០។ នាយករដ្ឋមន្ត្រីជប៉ុន លោក Shigeru Ishiba ក៏មានវត្តមាននៅក្នុងពិធីនេះដែរ ហើយលោកបានថ្លែងយ៉ាងម៉ឺងម៉ាត់ប្រឆាំងនឹងអាវុធនុយក្លេអ៊ែរ។

លោក Ishiba បាននិយាយថា៖ «ការខ្វែងគំនិតគ្នាកាន់តែខ្លាំងឡើងៗ នៅក្នុងសហគមន៍អន្តរជាតិ ជុំវិញវិធីសាស្ត្រ ក្នុងការរំសាយអាវុធនុយក្លេអ៊ែរ បានធ្វើឲ្យបរិយាកាសសន្តិសុខបច្ចុប្បន្នកាន់តែអសន្តិសុខខ្លាំងទៅៗ។ ប៉ុន្តែនោះហើយជាមូលហេតុដែលយើងត្រូវប្រឹងប្រែងឲ្យអស់ពីសមត្ថភាព ដើម្បីនាំមកនូវពិភពលោកដែលគ្មានសង្គ្រាមនុយក្លេអ៊ែរ និងពិភពលោកដែលគ្មានអាវុធនុយក្លេអ៊ែរ ក្រោមសន្ធិសញ្ញា ស្តីពីការមិនរីកសាយភាយអាវុធនុយក្លេអ៊ែរ ដែលជាមូលដ្ឋានគ្រឹះនៃការរំសាយអាវុធនុយក្លេអ៊ែរអន្តរជាតិ និងជាកិច្ចព្រមព្រៀងមិនរីកសាយភាយអាវុធ»។

គួររំលឹកថា នៅថ្ងៃទី៦ ខែសីហា ឆ្នាំ១៩៤៥ សហរដ្ឋអាមេរិកបានទម្លាក់គ្រាប់បែកបរមាណូលើទីក្រុងហ៊ីរ៉ូស៊ីម៉ា នៅវេលាម៉ោង ៨:១៥ព្រឹក (ម៉ោងក្នុងស្រុក)៕