មេដឹកនាំនៃប្រទេសអាស៊ែសបៃហ្សង់ និងអាមេនី គ្រោងនឹងជួបជាមួយប្រធានាធិបតីអាមេរិក លោក Donald Trump សម្រាប់កិច្ចប្រជុំកំពូលសន្តិភាព នៅទីក្រុង Washington នាថ្ងៃព្រហស្បតិ៍ (ទី៧ ខែសីហា) និងថ្ងៃសុក្រ (ទី៨ ខែសីហា) ជាព្រឹត្តិការណ៍ដែលអាចជំរុញឲ្យមានកិច្ចព្រមព្រៀងសន្តិភាព រវាងប្រទេសទាំងពីរ។

បន្ទាប់ពីមានជម្លោះដ៏ជូរចត់ជាមួយគ្នាអស់រយៈពេលជិត ៤ទសវត្សរ៍មក នៅទីបំផុត ទីក្រុង Baku និង Yerevan អាចនឹងដោះស្រាយឲ្យមានសន្តិភាពនៅក្នុងតំបន់ ហើយជាពិសេសនោះ ដំណើរការនេះ គឺស្ថិតនៅឆ្ងាយពីទីក្រុងមូស្គូ ដោយអតីតប្រទេសហភាពសូវៀតតំបន់កូកាសភាគខាងត្បូងទាំង២ បានផ្ដាច់ខ្លួនពីប្រទេសរុស្ស៊ី និងពីឥទ្ធិពលរបស់វិមានក្រឹមឡាំង។

កិច្ចប្រជុំនៅសេតវិមានជាមួយប្រធានាធិបតីអាមេរិក នឹងបញ្ជូនសញ្ញាដ៏រឹងមាំមួយទៅកាន់ទីក្រុងមូស្គូ មិនត្រឹមតែទាក់ទងនឹងការប្តេជ្ញាចិត្តរបស់ប្រទេសទាំង២ ក្នុងការស្វែងរកដំណោះស្រាយ ក្នុងចំណោមភាគីទាំង២ ប៉ុណ្ណោះទេ ប៉ុន្តែថែមទាំងបង្វែរទិសដៅគោលនយោបាយការបរទេសរបស់ខ្លួនទៅកាន់លោកខាងលិចផងដែរ។

ហើយអ្វីដែលសំខាន់នោះ គឺថា ជំនួបនេះក៏នឹងពង្រឹងផងដែរដល់កិច្ចប្រឹងប្រែងយ៉ាងទូលំទូលាយរបស់លោក Trump ក្នុងការអះអាងពីខ្លួនឯង និងសហរដ្ឋអាមេរិកថា ជាតួអង្គដ៏សំខាន់ ក្នុងការដោះស្រាយជម្លោះពិភពលោក៕