រដ្ឋាភិបាល បានឲ្យដឹងនៅលើបណ្ដាញសង្គម X ថា ក្រុមប្រឹក្សាសហព័ន្ធនៃប្រទេសស្វីស នឹងបើកកិច្ចប្រជុំវិសាមញ្ញមួយ នារសៀលថ្ងៃព្រហស្បតិ៍ (ទី៧ ខែសីហា) នេះ បន្ទាប់ពីគណៈប្រតិភូរបស់ខ្លួនទៅកាន់សហរដ្ឋអាមេរិក បានត្រលប់មកវិញហើយ ក្រោយបញ្ចប់ការប៉ុនប៉ង ដើម្បីបញ្ចៀសអត្រាពន្ធ ៣៩ភាគរយរបស់សហរដ្ឋអាមេរិក លើការនាំចូល ចំពោះផលិតផលរបស់ប្រទេសស្វីស។

នៅមុននេះ ប្រភពមួយ បានប្រាប់សារព័ត៌មាន Reuters ថា ប្រធានាធិបតីស្វីស លោកស្រី Karin Keller-Sutter បានចាកចេញពីទីក្រុងវ៉ាស៊ីនតោនដោយមិនទទួលបានលទ្ធផលផ្លែផ្កាអ្វីឡើយ កាលពីថ្ងៃពុធ (ទី៦ ខែសីហា) ពោលគឺមិនបានជួបជាមួយប្រធានាធិបតីអាមេរិក លោក Donald Trump ឬមន្ត្រីពាណិជ្ជកម្មជាន់ខ្ពស់ណាមួយរបស់លោក។

ប្រភពនោះបានបញ្ជាក់បន្ថែមថា សំណើរបស់លោកស្រី សម្រាប់អត្រាពន្ធ ១០ភាគរយ ត្រូវបានបដិសេធដោយមន្ត្រីសហរដ្ឋអាមេរិក។ តែលោកស្រី Keller-Sutter បាននិយាយនៅថ្ងៃពុធនោះថា លោកស្រីមាននូវ «ជំនួបល្អណាស់» ជាមួយរដ្ឋមន្ត្រីការបរទេសសហរដ្ឋអាមេរិក លោក Marco Rubio៕