ទីភ្នាក់ងារសារព័ត៌មានរដ្ឋ Xinhua នៅថ្ងៃព្រហស្បតិ៍ (ទី៧ ខែសីហា) បានរាយការណ៍ថា មនុស្សយ៉ាងតិច ៥នាក់ បានបាត់បង់ជីវិត បន្ទាប់ពីខ្សែកាបស្ពានយោលមួយ នៅក្នុងតំបន់ Xinjiang ភាគពាយ័ព្យនៃប្រទេសចិន បានដាច់ភ្លាមៗ ដែលបណ្តាលឲ្យពួកគេធ្លាក់ពីលើស្ពាននោះ។

ទីភ្នាក់ងារសារព័ត៌មាន Xinhua បានឲ្យដឹងថា ហេតុការណ៍នេះបានកើតឡើងនៅវេលាម៉ោង ៦ និង១៨នាទីយប់ ម៉ោងក្នុងស្រុក (ត្រូវនឹងម៉ោង ១០:១៨នាទី ម៉ោងសកល) ថ្ងៃពុធ (ទី៦ ខែសីហា) នៅតំបន់ទេសចរណ៍មួយ ក្នុងខេត្តស្វយ័ត Ili Kazakh ហើយក្រៅពីមានអ្នកស្លាប់ ក៏មានអ្នករងរបួស ២៤នាក់ផ្សេងទៀតផងដែរ។ សារព័ត៌មាននេះបានបន្ថែមថា តំបន់ដ៏ស្រស់ត្រកាលនោះ ត្រូវបានបិទ ខណៈដែលការស៊ើបអង្កេត អំពីហេតុការណ៍នេះ កំពុងដំណើរការ។

វីដេអូនៅលើបណ្ដាញសង្គមដែលត្រូវបានផ្ទៀងផ្ទាត់ដោយទីភ្នាក់ងារសារព័ត៌មាន Reuters បង្ហាញពីស្ពានយោលធា្លក់ទៅម្ខាង ដោយភ្នាក់ដៃធ្វើពីខ្សែកាបសំយុងចុះ នៅចន្លោះផ្លូវដើរលើស្ពាន និងដីខាងក្រោមស្ពាន។ ផ្នែកនៃស្ពានយោលនេះនៅពីលើទន្លេ។ រូបភាពវីដេអូទាំងនោះ ក៏បង្ហាញពីមនុស្សយ៉ាងតិច ២នាក់ដេកលើដីក្រោមស្ពាន។

នៅក្នុងសេចក្ដីរាយការណ៍ដាច់ដោយឡែកមួយទៀត សារព័ត៌មាន Xinhua បានឲ្យដឹងថា រដ្ឋាភិបាលកណ្តាល បានបញ្ជូនក្រុមការងារទៅកាន់កន្លែងកើតហេតុនេះ ដើម្បីត្រួតពិនិត្យការស៊ើបអង្កេត និងការព្យាបាលអ្នករបួស៕