នាយករដ្ឋមន្ត្រីស៊ូដង់ លោក Kamil Idris បានមកដល់ទីក្រុងគែរនៃប្រទេសអេហ្ស៊ីប នៅព្រឹកថ្ងៃព្រហស្បតិ៍នេះ សម្រាប់ដំណើរទស្សនកិច្ចក្រៅប្រទេសជាផ្លូវការលើកដំបូងរបស់លោក ចាប់តាំងពីចូលកាន់តំណែង ក្នុងខែឧសភា ខណៈដែលកងទ័ពរបស់ប្រទេសលោក នៅតែជាប់ផុងក្នុងសង្រ្គាមដ៏ឃោរឃៅ ជាមួយក្រុមទាហានប៉ារ៉ា។

លោក Idris ដែលជាអ្នកការទូតអាជីព និងជាអតីតមន្ត្រីអង្គការសហប្រជាជាតិ ត្រូវបានគេរំពឹងថា នឹងជួបពិភាក្សា ជាមួយប្រធានាធិបតីអេហ្ស៊ីបលោក អាប់ដែល ហ្វាតា អាល់ស៊ីស៊ី ( Abdel Fattah El-Sisi)។ នេះបើយោងតាមទីភ្នាក់ងារសារព័ត៌មានរដ្ឋរបស់ស៊ូដង់SUNA។

លោកក៏នឹងមានជំនួបបន្ថែម ជាមួយសមភាគីអេហ្ស៊ីបលោក Mostafa Madbouly និង «ពិភាក្សាអំពីវិធីនៃការពង្រឹងកិច្ចសហប្រតិបត្តិការទ្វេភាគី ក្នុងវិស័យផ្សេងៗ»។ នេះបើយោងតាមសេចក្តីថ្លែងការណ៍របស់គណៈរដ្ឋមន្ត្រីរបស់ប្រទេសអេហ្ស៊ីប។

ប្រទេសអេហ្ស៊ីប បានគាំទ្រថ្នាក់ដឹកនាំយោធារបស់ស៊ូដង់ ចាប់តាំងពីសង្រ្គាម បានផ្ទុះឡើង ក្នុងខែមេសា ឆ្នាំ ២០២៣ នៅពេលដែលសម្ព័ន្ធភាពដ៏ផុយស្រួយរវាងកងទ័ព និងកងកម្លាំងយោធាប៉ារ៉ាគាំទ្ររហ័ស (RSF)បានដួលរលំ។