នៅថ្ងៃព្រហស្បតិ៍ (ទី៧ ខែសីហា) នេះ ទូរទស្សន៍រដ្ឋ IRIB បានរាយការណ៍ថា លោក Rouzbeh Vadi ដែលប្រព័ន្ធផ្សព្វផ្សាយរដ្ឋ បានឲ្យដឹងថា ត្រូវបានប្រហារជីវិត កាលពីថ្ងៃពុធ (ទី៦ ខែសីហា) ពាក់ព័ន្ធនឹងការផ្តល់ព័ត៌មាន អំពីកម្មវិធីនុយក្លេអ៊ែររបស់អ៊ីរ៉ង់ដល់ទីភ្នាក់ងារចារកម្ម Mossad របស់អ៊ីស្រាអែល គឺជាអ្នកវិទ្យាសាស្ត្រនុយក្លេអ៊ែរផ្ទាល់តែម្ដង។

សារព័ត៌មាន Mizan របស់តុលាការ បានឲ្យដឹងកាលពីថ្ងៃពុធថា លោក Vadi ត្រូវបានកាត់ទោសពីបទធ្វើចារកម្មឲ្យអ៊ីស្រាអែល និងបញ្ជូនព័ត៌មាន អំពីអ្នកវិទ្យាសាស្ត្រនុយក្លេអ៊ែរដែលត្រូវបានសម្លាប់ នៅក្នុងការវាយប្រហារតាមអាកាសកាលពីខែមិថុនារបស់អ៊ីស្រាអែលទៅលើសាធារណរដ្ឋឥស្លាម។

នៅក្នុងអ្វីដែលទូរទស្សន៍ IRIB បានពិពណ៌នាជាវីដេអូសារភាពដែលត្រូវបានចាក់ផ្សាយ លោក Vadi បាននិយាយ៖ «ទីតាំងសំខាន់ គឺ Fordow និង Natanz (រោងចក្រចម្រាញ់សារធាតុអ៊ុយរ៉ានីញ៉ូម) ដែលខ្ញុំបានបញ្ជូនព័ត៌មាន។ ខ្ញុំបានប្រាប់ពួកគេថា ខ្ញុំដឹងរឿងនេះ ហើយប្រាប់អំពី Fordow។ ពួកគេ (ភ្នាក់ងារ Mossad) បានប្រាប់ខ្ញុំឲ្យផ្ញើទៅគ្រប់យ៉ាង»។

សំឡេងនៅក្នុងវីដេអូ បានបង្ហាញថា លោក Vadi បានជួបភ្នាក់ងារ Mossad ចំនួន ៥ដង នៅពេលស្ថិតនៅទីក្រុងវីយែន ប្រទេសអូទ្រីស ហើយត្រូវបានស្នើឲ្យបើកគណនីរូបិយប័ណ្ណគ្រីបតូ ដើម្បីទទួលបានការទូទាត់ សម្រាប់សេវាកម្មរបស់លោក។ ចុងចោទបាននិយាយនៅក្នុងវីដេអូនោះថា Mossad បានសន្យាផ្ដល់លិខិតឆ្លងដែនបរទេសឲ្យលោក ប្រសិនបើលោកបញ្ចប់កិច្ចសហប្រតិបត្តិការរយៈពេលវែង៕