សេវាសង្គ្រោះបន្ទាន់ក្នុងតំបន់ នៅថ្ងៃព្រហស្បតិ៍ (ទី៧ ខែសីហា) នេះ បានប្រាប់ឲ្យដឹងថា អគ្គិភ័យ នៅរោងចក្រចម្រាញ់ប្រេង Afipsky ក្នុងតំបន់ Krasnodar របស់ប្រទេសរុស្ស៊ី ដែលបណ្តាលមកពីបំណែកយានដ្រូនធ្លាក់ត្រូវ ត្រូវបានពន្លត់ហើយ។

ក្រសួងការពារជាតិរុស្ស៊ី បានប្រាប់ថា ប្រព័ន្ធការពារដែនអាកាស បានបាញ់ទម្លាក់យានដ្រូនរបស់អ៊ុយក្រែនចំនួន ៩គ្រឿង ពេញមួយយប់។

ភ្លាមៗនោះ គេមិនទាន់ដឹងច្បាស់ទេថា តើទំហំនៃការខូចខាត មានកម្រិតណា នៅរោងចក្រចម្រាញ់ប្រេង Afipsky ដែលរួមជាមួយរោងចក្រចម្រាញ់ Krasnodar បានដំណើរការដោះស្រាយប្រេងឆៅចំនួន ៧,២លានតោន ក្នុងឆ្នាំ២០២៤។

ប្រភពទីផ្សារ បានឲ្យដឹងថា ការរំខាន នៅរោងចក្រចម្រាញ់ប្រេង Afipsky នេះ អាចនាំឲ្យមានការប្រើប្រាស់ប្រេងឆៅទាប ដែលវាអាចនឹងជំរុញឲ្យមានការនាំចេញបន្ថែមរបស់រុស្ស៊ី ក្នុងខែសីហានេះ។

អ៊ុយក្រែនតែងតែបានវាយប្រហារយ៉ាងទៀងទាត់លើរុស្ស៊ី ដោយប្រើប្រាស់យានដ្រូន ហើយដាក់គោលដៅជាពិសេសលើរោងចក្រចម្រាញ់ប្រេងឆៅ ស្ថានីយ៍បូមទឹក និងកំពង់ផែដែលត្រូវបានប្រើប្រាស់ ដើម្បីនាំចេញប្រេង និងឧស្ម័ន៕