នាយករដ្ឋមន្ត្រីកោះ Solomon Islands លោក Jeremiah Manele បាននិយាយថា ប្រទេសម្ចាស់ជំនួយចំនួន ២១ ក្នុងនោះរួមមានទាំងសហរដ្ឋអាមេរិក និងចិនផងដែរ នឹងមិនត្រូវបានអញ្ជើញឲ្យចូលរួមក្នុងកិច្ចប្រជុំនយោបាយរបស់តំបន់នោះទេ ជាចំណាត់ការដែលធ្វើឡើងបន្ទាប់ពីមានសម្ពាធពីទីក្រុងប៉េកាំងឲ្យដកកោះតៃវ៉ាន់ចេញ។

សម្ព័ន្ធមិត្តសន្តិសុខដ៏ធំបំផុតរបស់ចិន នៅប្រជុំកោះប៉ាស៊ីហ្វិក គឺប្រទេសកោះ Solomon Islands នឹងធ្វើជាម្ចាស់ផ្ទះកិច្ចប្រជុំប្រចាំឆ្នាំនៃវេទិការបស់ប្លុកដែលមានសមាជិកទាំង ១៨ នៅខែកញ្ញា។

បណ្ដារដ្ឋកោះចំនួន ៣ មានទំនាក់ទំនងការទូតជាមួយកោះតៃវ៉ាន់ តែមិនមែនចិន ហើយពួកគេបានសម្តែងក្ដីបារម្ភថា មន្ត្រីកោះតៃវ៉ាន់ នឹងត្រូវបានរារាំងមិនឲ្យចូលប្រទេស។ ប្រទេសដែនកោះ Solomon Islands បានប្តូរទំនាក់ទំនងពីកោះតៃវ៉ាន់ទៅចិន ក្នុងឆ្នាំ២០១៩ ហើយបានដកកោះតៃវ៉ាន់ចេញពីបញ្ជីប្រទេសដែលមានសិទ្ធិចូលប្រទេសដោយងាយស្រួល ក្នុងខែមេសា។

កាលពីថ្ងៃពុធ (ទី៦ ខែសីហា) លោក Manele បានប្រាប់សភា Solomon Islands ថា គណៈរដ្ឋមន្ត្រីរបស់លោក បានសម្រេចថា គ្មានដៃគូសន្ទនាណាមួយ នឹងត្រូវបានអញ្ជើញឲ្យចូលរួមក្នុងព្រឹត្តិការណ៍ឆ្នាំ២០២៥ នោះទេ ព្រោះការពិនិត្យឡើងវិញ អំពីទំនាក់ទំនងរបស់ប្រទេសនីមួយៗ ជាមួយប្រទេសតំបន់ប៉ាស៊ីហ្វិក មិនទាន់ត្រូវបានបញ្ចប់សព្វគ្រប់នៅឡើយទេ។

លោកបានបន្តថា លោកបានប្រាប់មេដឹកនាំទាំង ១៨ នៃវេទិកានេះ អំពីការសម្រេច ក្នុងសប្តាហ៍នេះ។ ហើយលោកបានបន្ថែមថា ធនាគារពិភពលោក ធនាគារអភិវឌ្ឍន៍អាស៊ី និងក្រុមសង្គមស៊ីវិល នឹងចូលរួមកិច្ចប្រជុំនេះ ៕