គណៈរដ្ឋមន្ត្រីសន្តិសុខរបស់អ៊ីស្រាអែលបានអនុម័តសំណើរបស់លោកនាយករដ្ឋមន្ត្រី Benjamin Netanyahu ដើម្បីកាន់កាប់ទីក្រុងហ្កាហ្សា នេះបើយោងតាមការចុះផ្សាយលើបណ្ដាញសង្គម X របស់សារព័ត៌មានAxios នៅព្រឹកថ្ងៃសុក្រនេះ ដោយដកស្រង់សម្តីក្រុមមន្ត្រីអ៊ីស្រាអែលមិនបញ្ជាក់អត្តសញ្ញាណមួយរូប។

ក្រោយមកយោងតាមសម្តីរបស់ការិយាល័យនាយករដ្ឋមន្ត្រីបានឲ្យដឹងថា គណៈរដ្ឋមន្ត្រីសន្តិសុខបានអនុម័តសំណើរបស់នាយករដ្ឋមន្ត្រីដើម្បីកម្ចាត់ក្រុមហាម៉ាស។កងកម្លាំងការពារអ៊ីស្រាអែល IDF នឹងរៀបចំដើម្បីគ្រប់គ្រងទីក្រុងហ្កាហ្សា ខណៈផ្តល់ជំនួយមនុស្សធម៌ដល់ជនស៊ីវិលនៅខាងក្រៅតំបន់ប្រយុទ្ធនានា ។

ផែនការដែលស្នើឡើងដោយលោក Netanyahu និងបានពិភាក្សានៅក្នុងកិច្ចប្រជុំកាលពីថ្ងៃព្រហស្បតិ៍ដល់យប់ជ្រៅថ្ងៃសុក្រនេះ រួមមានការឡោមព័ទ្ធទីក្រុងហ្កាហ្សា និងការផ្លាស់ទីលំនៅប្រជាជនប្រហែលមួយលាននាក់ទៅកាន់ផ្នែកខាងត្បូងនៃតំបន់រងការឡោមព័ទ្ធមួយនេះ។សារព័ត៌មាន KAN News បានឲ្យដឹងថា កិច្ចប្រជុំនេះមានរយៈពេលប្រមាណ១០ម៉ោង។

ក្រោយមក មន្ត្រីជាន់ខ្ពស់អ៊ីស្រាអែលមួយរូប បានប្រាប់សារព័ត៌មាន The Jerusalem Post ថា យោធានឹងកំណត់គោលដៅលើបន្ទាយភេរវករនៅក្នុងទីក្រុងនេះ ជាមួយនឹងប្រតិបត្តិការនានាដែលក្រោយមក នឹងត្រូវពង្រីកទៅកាន់ជំរំជនភៀសខ្លួនភាគកណ្តាល។



ក្រុមមន្ត្រីអ៊ីស្រាអែល និយាយថា កងកម្លាំង IDF ត្រូវគេរំពឹងថានឹងចេញបញ្ជាជម្លៀសមុនពេលបើកការវាយលុកថ្មីដល់ប្រជាជនប៉ាឡេស្ទីនចំនួន១លាននាក់ ដែលរស់នៅក្នុងទីក្រុងហ្កាហ្សានិងឡោមព័ទ្ធភ្លាម។

IDF ក៏នឹងចូលទៅកាន់តំបន់នានាជាទីដែលក្រុមមន្ត្រីអ៊ីស្រាអែលជឿថាចំណាប់ខ្មាំងត្រូវបានឃុំខ្លួនផងដែរ ដែលអាចបង្កហានីភ័យដល់អាយុជីវិតរបស់ពួកគេ៕