ក្រុមហ៊ុនផលិតរថយន្ត Toyota Motor របស់ប្រទេសជប៉ុនបាននិយាយកាលពីថ្ងៃព្រហស្បតិ៍ថាខ្លួនរំពឹងថានឹងខាតបង់ប្រាក់ចំណេញជិត១០ ពាន់លានដុល្លារពីពន្ធរបស់លោកប្រធានាធិបតី Donald Trump លើរថយន្តនាំចូលទៅសហរដ្ឋអាមេរិក គឺជាទំហំប៉ាន់ប្រមាណខ្ពស់បំផុត ដោយក្រុមហ៊ុនមួយចំនួន។    

ក្រុមហ៊ុនផលិតរថយន្តដែលលក់ដាច់បំផុតរបស់ពិភពលោកមួយនេះ ក៏បានកាត់បន្ថយការព្យាករណ៍របស់ខ្លួនចំនួន១៦%ផងដែរសម្រាប់ប្រាក់ចំណេញប្រតិបត្តិការពេញមួយឆ្នាំ ដោយឆ្លុះបញ្ចាំងពីបញ្ហាប្រឈមសម្រាប់ក្រុមហ៊ុនផលិតរថយន្តនានាទូទាំងពិភពលោកដែលកំពុងប្រឈមនឹងការកើនឡើងនៃការចំណាយពីពន្ធលើរថយន្ត គ្រឿងបន្លាស់ ដែកថែប និងអាលុយមីញ៉ូម។ 

លោក Takanori Azuma ប្រធានផ្នែកហិរញ្ញវត្ថុរបស់ក្រុមហ៊ុន Toyota បាននិយាយនៅក្នុងសន្និសីទសារព័ត៌មានមួយថា វាពិតជាលំបាកណាស់សម្រាប់យើងក្នុងការទស្សន៍ទាយអ្វីដែលនឹងកើតឡើងទាក់ទងនឹងបរិយាកាសទីផ្សារ ដោយប្ដេជ្ញាបន្តផលិតរថយន្តសម្រាប់អតិថិនជនអាមេរិកទោះមានការប៉ះពាល់ដោយសារការដំឡើងពន្ធនេះក៏ដោយ។  

លោក Azuma បាននិយាយថាការប៉ាន់ប្រមាណចំនួន ១,៤ សែនកោដិយ៉េន ឬស្មើ ៩,៥ ពាន់លានដុល្លារ ក៏រួមបញ្ចូលផងដែរនូវបណ្ដាក្រុមហ៊ុនផ្គត់ផ្គង់កំពុងប្រឈម ជាពិសេសក្រុមហ៊ុននៅក្នុងសហរដ្ឋអាមេរិកដែលនាំចូលគ្រឿងបន្លាស់ពីប្រទេសជប៉ុន។

បណ្ដាក្រុមហ៊ុនគូប្រជែង បានរាយការណ៍ពីការប៉ះពាល់ដល់ពន្ធតិចតួចរហូតមកដល់ពេលនេះ ជាក់ស្ដែង ក្រុមហ៊ុន General Motors (GM)របស់អាមេរិក បានព្យាករការខាតបង់ពី ៤ ពាន់លានដុល្លារទៅ ៥ ពាន់លានដុល្លារសម្រាប់ឆ្នាំនេះ ខណៈក្រុមហ៊ុន Ford (F) រំពឹងថានឹងខាងបង់សរុបចំនួន ៣ពាន់លានដុល្លារសម្រាប់ប្រាក់ចំណូលសរុបពេញមួយឆ្នាំ៕