បុគ្គលិកសង្គ្រោះបន្ទាន់បាននិយាយថា រថភ្លើងបានបុកជាមួយរថយន្តក្រុងដឹកបុគ្គលិកនៅលើផ្លូវរថភ្លើងឆ្លងកាត់ក្នុងទីក្រុង Naivasha ប្រទេសកេនយ៉ា កាលពីថ្ងៃព្រហស្បតិ៍ ទី៧ ខែសីហា បណ្តាលឲ្យមនុស្សយ៉ាងហោចណាស់៤នាក់ស្លាប់ និងជាច្រើននាក់រងរបួស។

រថយន្តក្រុង ដំណើរការដោយក្រុមហ៊ុន Kenya Pipeline Company កំពុងដឹកបុគ្គលិក ដែលបានបញ្ចប់វគ្គបណ្តុះបណ្តាលនៅពេលព្រឹកនៅក្នុងតំបន់។



បុគ្គលិកកាកបាទក្រហមកេនយ៉ាម្នាក់នៅកន្លែងកើតហេតុបានប្រាប់សារព័ត៌មាន Reuters ថា សាកសពចំនួន៤នាក់ត្រូវបានគេឃើញស្ថិតក្នុងបំណែកបាក់បែក។ ក្រុមហ៊ុន ពុំបានបញ្ជាក់ពីចំនួនអ្នកស្លាប់និងរងរបួសនោះទេ។ ប្រព័ន្ធផ្សព្វផ្សាយក្នុងតំបន់បានដកស្រង់សម្ដីអធិការនគរបាលម្នាក់ដែលបាននិយាយថាមនុស្សយ៉ាងហោចណាស់៦នាក់បានស្លាប់និងរាប់សិបនាក់បានរងរបួស។ សាក្សីម្នាក់បាននិយាយថា រថយន្តក្រុងមានមនុស្សពេញនៅពេលបុកជាមួយរថភ្លើង។

សាក្សីដែលបានឃើញហេតុការណ៍បាននិយាយថា «មានមនុស្សរងរបួសច្រើននាក់ ខណៈរថយន្តក្រុងបានដឹកមនុស្សជាច្រើនជាបុគ្គលិករបស់ក្រុមហ៊ុន Kenya Pipeline។

វីដេអូពីកន្លែងកើតហេតុបានបង្ហាញពីបុគ្គលិកសង្គ្រោះបន្ទាន់យកសាកសពចេញពីរថយន្តក្រុងដែលខូចខាត ដោយមាននគរបាលនិងអ្នកឈរមើល នៅក្បែរនោះ។