ក្រុមអ្នកជំនាញរបស់អង្គការសហប្រជាជាតិ បាននិយាយកាលពីថ្ងៃព្រហស្បតិ៍ (៧ សីហា) ថា ដើម្បីបញ្ចៀសការស្លាប់បន្ថែមទៀត និងទុក្ខវេទនាដ៏អមនុស្សធម៌ដោយសារភាពអត់ឃ្លាន អ៊ីស្រាអែលត្រូវតែស្ដារការចូលទៅកាន់តំបន់ហ្កាហ្សាឡើងវិញភ្លាមៗ ដោយអង្គការមនុស្សធម៌ដែលមិនលំអៀង រួមទាំងទីភ្នាក់ងារជំនួយ និងសម្រាលបន្ទុករបស់អង្គការសហប្រជាជាតិ (UNRWA) និងការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA)។

ក្រុមអ្នកជំនាញទាំងនោះបានលើកឡើងថា "បណ្ដារដ្ឋទាំងអស់ត្រូវតែធ្វើសកម្មភាពយ៉ាងម៉ឺងម៉ាត់ដើម្បីទប់ស្កាត់ការបំផ្លិចបំផ្លាញរបស់អ៊ីស្រាអែល ចំពោះលក្ខខណ្ឌនៃជីវិតនៅក្នុងតំបន់ហ្កាហ្សា និងបញ្ឈប់សង្គ្រាមមិនចេះចប់របស់ខ្លួនលើមនុស្សជាតិ"។ អ្នកជំនាញបន្តថា “អន្តរជាតិត្រូវតែធ្វើគ្រប់យ៉ាងតាមអំណាចរបស់ពួកគេ ដើម្បីស្តារប្រព័ន្ធមនុស្សធម៌របស់អង្គការសហប្រជាជាតិនៅតំបន់ហ្កាហ្សាឱ្យរស់រានឡើងវិញ”។

ទិន្នន័យរបស់ទីភ្នាក់ងារអង្គការសហប្រជាជាតិបានបង្ហាញថា មនុស្សជាង ៥០ម៉ឺននាក់ - ពោលគឺមួយភាគបួននៃចំនួនប្រជាជនសរុបនៅហ្កាហ្សា - កំពុងប្រឈមនឹងគ្រោះទុរ្ភិក្ស ហើយកុមារអាយុក្រោម ៥ឆ្នាំទាំងអស់ ពោលគឺ ៣២ម៉ឺននាក់ មានហានិភ័យនៃកង្វះអាហារូបត្ថម្ភធ្ងន់ធ្ងរ ជាមួយនឹងផលវិបាកធ្ងន់ធ្ងរដល់សុខភាពផ្លូវកាយ និងផ្លូវចិត្តពេញមួយជីវិត។

មហាសន្និបាត និងក្រុមប្រឹក្សាសន្តិសុខបានប្រកាសថាទីភ្នាក់ងារជំនួយប៉ាឡេស្ទីន UNRWA ជាឆ្អឹងខ្នងមិនអាចខ្វះបាននៃការផ្តល់ជំនួយមនុស្សធម៌របស់អង្គការសហប្រជាជាតិ សម្រាប់ប្រជាជនហ្កាហ្សា ២,៣លាននាក់ រួមទាំងស្បៀងអាហារ ទីជម្រក និងការថែទាំសុខភាព ជាពិសេសសម្រាប់ស្ត្រី និងកុមារ និងជនភៀសខ្លួនជិត ២លាននាក់៕