សារព័ត៌មាន The Guardian បានរាយការណ៍ថា អង្គការលើកលែងទោសអន្តរជាតិ បានព្រមាននគរបាល ក្រុងឡុងដ៍ ឲ្យជៀសវាងការចាប់ខ្លួនក្រុមបាតុករ ដែលបង្ហាញការគាំទ្រចំពោះក្រុមសកម្មភាព ប៉ាឡេស្ទីន ដែលត្រូវបានហាមឃាត់។

ការព្រមានេះ បានកើតឡើង នៅមុនការតវ៉ាដ៏ធំមួយដែលគ្រោងធ្វើនៅថ្ងៃសៅរ៍ នៅទីក្រុងឡុងដ៍ ហើយខណៈដែលចំនួនមនុស្សដែលត្រូវបានកាត់ទោសពីបទបង្ហាញការគាំទ្រដល់អង្គការនេះ នៅតែបន្តកើន     ឡើង។

មនុស្ស ៣នាក់ ដែលត្រូវបានចាប់ខ្លួន នៅទីក្រុង Westminster ក្នុងខែកក្កដា និងត្រូវបានចោទប្រកាន់ពីបទបង្ហាញការគាំទ្រដល់អង្គការ ដែលត្រូវបានហាមឃាត់នេះ នឹងត្រូវបង្ហាញខ្លួននៅក្នុងតុលាការ នៅថ្ងៃទី ១៦ ខែកញ្ញា។ ចាប់តាំងពីសកម្មភាពប៉ាឡេស្ទីន ត្រូវបានហាមឃាត់ នៅថ្ងៃទី ០៥ ខែកក្កដា នគរបាលនៅទូទាំងចក្រភពអង់គ្លេស បានចាប់ខ្លួនមនុស្សចំនួន ២២១នាក់ ជុំវិញបទល្មើសដែលសង្ស័យ ក្រោមច្បាប់ភេរវកម្ម។

ក្រុមគាំទ្រប៉ាឡេស្ទីននេះ ត្រូវបានចុះបញ្ជីជាអង្គការភេរវកម្ម បន្ទាប់ពីបានវាយលុកចូលមូលដ្ឋានអាកាស RAF កាលពីថ្ងៃទី ២០ ខែមិថុនា និងបង្កឲ្យខូចខាតដល់យន្តហោះ។

ការតវ៉ាគាំទ្រក្រុមនេះ នៅចុងសប្តាហ៍នេះ នឹងធ្វើឡើង នៅទីលានសភា (Parliament Square) កណ្តាលទីក្រុងឡុងដ៍។ អ្នករៀបចំ ដែលជាក្រុមសម្ពាធ «Defend Our Juries» បានស្នើសុំឲ្យក្រុមអ្នកតវ៉ាកាន់បដា ដែលសរសេរថា៖«ខ្ញុំប្រឆាំងអំពើប្រល័យពូជសាសន៍ ខ្ញុំគាំទ្រសកម្មភាពប៉ាឡេស្ទីន»។