ប្រជាជនប៉ាឡេស្ទីននៅក្នុងតំបន់ហ្កាហ្សាស្រ្ទីប ដែលហែកហួរដោយសង្រ្គាម កាលពីថ្ងៃព្រហស្បតិ៍ (៧ សីហា) បានសម្តែងការខឹងសម្បារ ភាពភ័យខ្លាច ការខកចិត្ត និងហត់នឿយនឹងទុក្ខវេទនា បន្ទាប់ពីសេចក្តីថ្លែងការណ៍របស់លោកនាយករដ្ឋមន្ត្រីអ៊ីស្រាអែល Benjamin Netanyahu ដែលថាលោកចង់ឱ្យអ៊ីស្រាអែល កាន់កាប់ផ្នែកយោធាលើតំបន់ហ្កាហ្សាស្រ្ទីបទាំងមូល។

លោក Mahmoud al-Qurashli ជនភៀសខ្លួនប៉ាឡេស្ទីនដែលមានដើមកំណើតមកពីតំបន់ហ្កាហ្សាភាគខាងកើត បាននិយាយថា "ទឹកដីនេះត្រូវបានបំផ្លិចបំផ្លាញរួចហើយ ហើយការសម្រេចចិត្តរបស់លោក Netanyahu ក្នុងការកាន់កាប់ហ្កាហ្សា គឺដូចជាគ្មានអ្វីនៅសល់ឱ្យកាន់កាប់ទៀតទេ"។ លោកបន្តថា មកដល់ចំណុចនេះ គ្មានអ្វីខុសប្លែកគ្នាទៀតទេទោះអ៊ីស្រាអែលកាន់កាប់ឬអត់ក៏ដោយ។

អ្នកស្រុកជាច្រើនទៀតបាននិយាយថា តម្រូវការមូលដ្ឋាននៅហ្កាហ្សាបានបាត់បង់អស់ហើយ គ្មានទាំងមធ្យោបាយនៃការរស់រាន គ្មានទាំងសញ្ញាជីវិត ប៉ុន្តែពលរដ្ឋទាំងអស់សូមអធិស្ឋានថា ការសម្រេចចិត្តនេះនឹងមិនត្រូវបានអនុវត្តទៅចុះ ហើយថាបទឈប់បាញ់អាចឈានដល់បាន។

ការគ្រប់គ្រងទាំងស្រុងលើទឹកដីនេះនឹងក្លាយជាការបញ្ច្រាសលើការសម្រេចចិត្តឆ្នាំ២០០៥ របស់អ៊ីស្រាអែល ដែលបានដកពលរដ្ឋ និងទាហានអ៊ីស្រាអែលចេញពីហ្កាហ្សា ប៉ុន្តែនៅរក្សាការគ្រប់គ្រងលើព្រំដែន ដែនអាកាស និងថាមពលប្រើប្រាស់របស់ទឹកដីនេះ។ បណ្ដាគណបក្សស្តាំនិយមរបស់អ៊ីស្រាអែល បានបន្ទោសការសម្រេចចិត្តដកខ្លួននេះថាជាមូលហេតុនាំឱ្យក្រុមសកម្មប្រយុទ្ធប៉ាឡេស្ទីនហាម៉ាស ទទួលបានអំណាចនៅទីនោះក្នុងការបោះឆ្នោតឆ្នាំ២០០៦៕