ការិយាល័យរបស់លោកនាយករដ្ឋមន្ត្រី Benjamin Netanyahu បានបញ្ជាក់ថា គណៈរដ្ឋមន្ត្រីសន្តិសុខរបស់អ៊ីស្រាអែល បានអនុម័តផែនការ ដើម្បីគ្រប់គ្រងទីក្រុងហ្កាហ្សា។

តាមរយៈសេចក្តីថ្លែងការណ៍ដែលបានចេញផ្សាយនៅព្រឹកថ្ងៃសុក្រ (ទី៨ ខែសីហា) នេះ បានរៀបរាប់លម្អិតអំពីផែនការ ៥ចំណុច ដើម្បី «លុបបំបាត់ក្រុមហាម៉ាស» និង «បញ្ចប់សង្រ្គាម»។ ផែនការនេះត្រូវបានអនុម័តដោយការបោះឆ្នោតគាំទ្រភាគច្រើន។ នៅមុននេះ លោក Netanyahu បានប្រាប់ថា អ៊ីស្រាអែលមានបំណងចង់កាន់កាប់តំបន់ហ្កាហ្សាទាំងអស់ ប៉ុន្តែផែនការនេះ លើកឡើងតែអំពីទីក្រុងហ្កាហ្សាប៉ុណ្ណោះ។

អង្គការសហប្រជាជាតិ (UN) បានព្រមានថា ការកាន់កាប់ដោយយោធាទាំងស្រុង នឹងបង្កជាហានិភ័យឲ្យមាន «ផលវិបាកដ៏មហន្តរាយ» សម្រាប់ជនស៊ីវិលប៉ាឡេស្ទីន និងចំណាប់ថ្នូរអ៊ីស្រាអែលដែលត្រូវបានឃុំខ្លួន នៅតំបន់ហ្កាហ្សា។ ហើយឯកអគ្គរដ្ឋទូតរបស់ចក្រភពអង់គ្លេសប្រចាំនៅអ៊ីស្រាអែល បានលើកឡើងថា វានឹងជា «កំហុសដ៏ធំ»។

បណ្ដារដ្ឋមន្ត្រីបានបោះឆ្នោតគាំទ្រ ដើម្បីបញ្ជាក់ឡើងវិញនូវគោលដៅសង្រ្គាមរបស់អ៊ីស្រាអែល ដូចជាសង្គ្រោះចំណាប់ថ្នូរទាំងអស់ពីក្រុមហាម៉ាស រំសាយអាវុធក្រុមឥស្លាមនិយមគាំទ្រដោយអ៊ីរ៉ង់ និងធ្វើឲ្យតំបន់ហ្កាហ្សាស្ទ្រីបគ្មានយោធា។ នេះបើយោងតាមសេចក្តីថ្លែងការណ៍ដែលបានធ្វើឡើងបន្ទាប់ពីមានកិច្ចប្រជុំរយៈពេល ១០ម៉ោងនៃគណៈរដ្ឋមន្ត្រីសន្តិសុខ។

រដ្ឋមន្ត្រីទាំងនោះបានគាំទ្រដល់ការបន្តគ្រប់គ្រងសន្តិសុខរបស់អ៊ីស្រាអែលលើដែនដីប៉ាឡេស្ទីន និងរដ្ឋបាលក្រោយសង្គ្រាមមួយដែលមិនមែនជាក្រុមហាម៉ាស ឬអាជ្ញាធរប៉ាឡេស្ទីន។

គួរបញ្ជាក់ថា IDF (កងកម្លាំងការពារជាតិរបស់អ៊ីស្រាអែល) បានគ្រប់គ្រងរួចហើយលើតំបន់ហ្កាហ្សាប្រហែល ៧៥ភាគរយ ដោយបានធ្វើឲ្យប្រជាជនប៉ាឡេស្ទីនរាប់សែននាក់ជម្លៀសខ្លួន ដែលទីក្រុង និងផ្ទះសម្បែងរបស់ពួកគេ ត្រូវបានបំផ្លិចបំផ្លាញ៕