អូស្ត្រាលីបានជំរុញឲ្យអ៊ីស្រាអែល «កុំអនុវត្តតាមវិធានការនេះ» បន្ទាប់ពីនាយករដ្ឋមន្ត្រី លោក Benjamin Netanyahu បានប្រាប់ថា អ៊ីស្រាអែលមានបំណងចង់គ្រប់គ្រងដោយយោធា នៅតំបន់ហ្កាហ្សា ហើយគណៈរដ្ឋមន្ត្រីរបស់លោក បានបោះឆ្នោតគាំទ្រដល់ការកាន់កាប់ដំបូងលើទីក្រុងហ្កាហ្សា។

រដ្ឋមន្ត្រីការបរទេស លោកស្រី Penny Wong បានលើកឡើងនៅក្នុងសេចក្តីថ្លែងការណ៍មួយថា៖ «អូស្ត្រាលីអំពាវនាវឲ្យអ៊ីស្រាអែលកុំអនុវត្តវិធានការនេះ ដែលវានឹងធ្វើឲ្យមហន្តរាយមនុស្សធម៌កាន់តែអាក្រក់ទៅៗ នៅតំបន់ហ្កាហ្សា»។

លោក Wong បានបញ្ជាក់ថា ការបម្លាស់ទីលំនៅដោយបង្ខំជាអចិន្ត្រៃយ៍ គឺជាការរំលោភលើច្បាប់អន្តរជាតិ ហើយបានអំពាវនាវម្តងទៀតឲ្យមានបទឈប់បាញ់ លំហូរជំនួយដោយមិនមានការរារាំង និងដើម្បីឲ្យក្រុមភេរវករហាម៉ាសប្រគល់មកវិញនូវចំណាប់ថ្នូរដែលត្រូវបានចាប់ខ្លួន ក្នុងខែតុលា ឆ្នាំ២០២៣។

ហើយជាមួយគ្នានេះ លោកស្រីបានបន្ថែមថា៖ «ដំណោះស្រាយរដ្ឋ២ គឺជាវិធីតែមួយគត់ ដើម្បីធានាបានសន្តិភាពយូរអង្វែង ពោលគឺរដ្ឋប៉ាឡេស្ទីន និងរដ្ឋអ៊ីស្រាអែល រស់នៅក្បែរគ្នាប្រកបដោយសន្តិភាព និងសន្តិសុខ ដែលមានព្រំដែនទទួលស្គាល់ជាអន្តរជាតិ»។

ប្រទេសអូស្ត្រាលីមិនទាន់បានចូលរួមជាមួយសម្ព័ន្ធមិត្តលោកខាងលិច ដូចជាចក្រភពអង់គ្លេស កាណាដា និងបារាំង ក្នុងការប្រកាសថា ខ្លួននឹងទទួលស្គាល់ភាពជារដ្ឋរបស់ប៉ាឡេស្ទីន ប៉ុន្តែបានបង្ហើបថា ខ្លួននឹងសម្រេចចិត្ត «នៅក្នុងពេលវេលាដ៏សមស្រប» ខណៈដែលរិះគន់កាន់តែខ្លាំងឡើងៗ ចំពោះសកម្មភាពរបស់អ៊ីស្រាអែល៕