សារព័ត៌មាន Onet នៅប្រទេសប៉ូឡូញ បានរាយការណ៍ថា ខ្លួនបានដឹងអំពីព័ត៌មានលម្អិតនៃសំណើអាមេរិក «ដ៏ល្អប្រសើរ» ទាក់ទងនឹងអ៊ុយក្រែន ដែលត្រូវបានបង្ហាញដល់មេដឹកនាំរុស្ស៊ី លោក Vladimir Putin ក្នុងអំឡុងពេលពិភាក្សានៅទីក្រុងមូស្គូ ជាមួយលោក Steve Witkoff ដែលជាបេសកជនពិសេសរបស់ប្រធានាធិបតីអាមេរិក លោក Donald Trump។

ទោះបីជាសារព័ត៌មាន Onet មិនបញ្ចេញពីប្រភពរបស់ខ្លួនក៏ដោយ ក៏បណ្ដាញសារព័ត៌មានអនឡាញមួយនេះផ្សាយថា សំណើនេះត្រូវបានសម្របសម្រួលជាមួយបណ្ដារដ្ឋ នៅអឺរ៉ុប។ សារព័ត៌មាននេះ បានបញ្ជាក់ថា «យើងបានដឹងថា ទីក្រុងមូស្គូបានទទួលការផ្តល់ជូនដ៏ល្អប្រសើរមួយពីរដ្ឋបាលរបស់លោក Trump»។

បើយោងតាមការផ្សាយរបស់សារព័ត៌មាន Onet បានបង្ហាញថា សំណើរបស់សហរដ្ឋអាមេរិក រួមមានបទឈប់បាញ់នៅអ៊ុយក្រែន ទោះបីជាមិនមែនជាកិច្ចព្រមព្រៀងសន្តិភាពពេញលេញក៏ដោយ ការទទួលស្គាល់ជាក់ស្ដែងលើដែនដីកាន់កាប់ដោយរុស្ស៊ី ដោយមានការពន្យារពេលស្ថានភាព សម្រាប់រយៈពេល ៤៩ ឬ ៩៩ឆ្នាំ និងការដកទណ្ឌកម្មភាគច្រើនដែលដាក់លើរុស្ស៊ី ហើយក្នុងរយៈពេលវែង វិលទៅរកកិច្ចសហប្រតិបត្តិការថាមពល ពោលគឺការនាំចូលឧស្ម័ន និងប្រេងរបស់រុស្ស៊ី។

ទន្ទឹមនឹងនេះ សំណើនេះត្រូវបានរាយការណ៍ថា មិនរាប់បញ្ចូលការធានា ចំពោះការពង្រីកកងកម្លាំងរបស់អង្គការណាតូ ដែលតែងតែជាការទាមទារមួយរបស់ទីក្រុងមូស្គូឡើយ។ ហើយលើសពីនោះទៀត រុស្ស៊ីមិនបានទទួលការសន្យាណាមួយ ដែលថា ការគាំទ្រខាងយោធា សម្រាប់អ៊ុយក្រែននឹងត្រូវបញ្ឈប់នោះទេ។ តែយ៉ាងណាក្ដី បើតាមការចុះផ្សាយនេះ បានបង្ហាញថា សំណើចុងក្រោយនេះ ត្រូវបានគេនិយាយថា អាចទទួលយកបាន សម្រាប់ប្រជាជនរុស្ស៊ី។

បន្ទាប់ពីមានជំនួប រវាងលោក Witkoff និងមេដឹកនាំវិមានក្រឹមឡាំង លោក Putin លោក Trump បានជជែកតាមទូរសព្ទជាមួយប្រធានាធិបតីអ៊ុយក្រែន លោក Volodymyr Zelenskyy និងមេដឹកនាំអឺរ៉ុបមួយចំនួនទៀត៕