នៅថ្ងៃសុក្រ (ទី៨ ខែសីហា) នេះ អាជ្ញាធរបានព្រមានថា ចំហេះព្រៃដ៏ធំបំផុតជាលើកដំបូងរបស់ប្រទេសបារាំង ក្នុងរយៈពេលជាច្រើនទស្សវត្សរ៍ នឹងបន្តឆាបឆេះអស់រយៈពេលជាច្រើនថ្ងៃទៀត បើទោះបីជាអណ្តាតភ្លើងអាចគ្រប់គ្រងបានក៏ដោយ។

គួរបញ្ជាក់ថា អណ្ដាតភ្លើងដ៏សន្ធោរសន្ធៅនៃអគ្គិភ័យ នៅតំបន់ភាគខាងត្បូង Aude បានឆាបឆេះផ្ទៃដីជាង ១៧.០០០ហិកតា ដែលជាតំបន់មានទំហំធំជាងទីក្រុងប៉ារីស ដោយបានបណ្ដាលឲ្យមនុស្សម្នាក់សា្លប់ ១៣នាក់រងរបួស និងផ្ទះសម្បែងរាប់សិបខ្នងរងការបំផ្លិចបំផ្លាញ។

អ្នកពន្លត់អគ្គិភ័យប្រហែល ២.០០០នាក់ នៅតែបំពេញកាតព្វកិច្ច នៅជុំវិញតំបន់មានចំហេះ ដែលត្រូវបានប្រកាសថា ស្ថិតនៅក្រោមការគ្រប់គ្រងកាលពីយប់ថ្ងៃព្រហស្បតិ៍ (ទី៧ ខែសីហា)។ ប៉ុន្តែអភិបាលតំបន់ Aude លោក Christian Pouget បានប្រាប់ថា៖ «ភ្លើងនឹងមិនត្រូវបានប្រកាសថា ត្រូវបានពន្លត់ទាំងស្រុង ជាច្រើនថ្ងៃទៀត។ នៅមានការងារជាច្រើនដែលត្រូវធ្វើ»។

អាជ្ញាធរបានហាមប្រាមមិនឲ្យចូលទៅកាន់ព្រៃរងផលប៉ះពាល់ពីចំហេះនេះ រហូតដល់យ៉ាងហោចណាស់ក៏ថ្ងៃអាទិត្យចុងសប្ដាហ៍នេះដែរ ដោយបញ្ជាក់ថា ផ្លូវក្នុងតំបន់មានគ្រោះថ្នាក់ខ្លាំងពេក ដោយសារតែបណ្ដាញអគ្គិសនី ដូចជាខ្សែដាច់ធ្លាក់ និងបង្គោលដួលរលំ ព្រមទាំងគ្រោះថ្នាក់ផ្សេងៗទៀត។

ជាមួយគ្នានេះ លោក Pouget បានឲ្យដឹងបន្ថែមថា មនុស្សប្រហែល ២.០០០នាក់ ដែលត្រូវបានបង្ខំឲ្យចាកចេញដោយសារអគ្គិភ័យនេះមិនទាន់ត្រូវបានអនុញ្ញាតឲ្យវិលត្រលប់ទៅផ្ទះសម្បែងវិញទេ។ មនុស្សរាប់រយនាក់ កំពុងនាំគ្នាស្នាក់នៅក្នុងកន្លែងហាត់ប្រាណរបស់សាលា និងសាលតាមភូមិ នៅទូទាំងតំបន់៕