ទីភ្នាក់ងារឧតុនិយមជប៉ុននៅថ្ងៃសុក្រនេះ បានចេញការប្រកាសអាសន្នពិសេសសម្រាប់ភ្លៀងធ្លាក់ខ្លាំងនៅខេត្ត Kagoshima ស្ថិតលើកោះភាគខាងត្បូង Kyushu ដោយពួកគេណែនាំឲ្យប្រជាពលរដ្ឋបន្តស្នាក់នៅក្នុងផ្ទះ ។

យោងតាមសេចក្តីរាយការណ៍ពីទូរទស្សន៍ជាតិជប៉ុន NHK បានឲ្យដឹងថា ក្នុងរយៈពេល ២៤ម៉ោងកន្លងមកនេះ ភ្លៀងបានធ្លាក់កម្ពស់ ៥០០មីលីម៉ែត្រនៅទីក្រុង Kirishima ហើយក្រុមអាជ្ញាធរក្នុងស្រុកបានចេញការព្រមានជម្លៀសខ្លួនដល់អ្នកស្រុកនៅតាមតំបន់រងផលប៉ះពាល់ ។

សារព័ត៌មានក្នុងស្រុក រាយការណ៍ថា នៅទីក្រុង Aira បំណក់ដីបង្កឡើងដោយភ្លៀងធ្លាក់ខ្លាំង បណ្តាលឲ្យខូចខាតផ្ទះសម្បែងប្រជាពលរដ្ឋជាច្រើនខ្នង ខណៈក្រុមជួយសង្រ្គោះ បានព្យាយាមស្វែងរកស្រ្តីវ័យជាង ៣០ឆ្នាំម្នាក់ ដែលកំពុងបាត់ខ្លួន ។

ភ្លៀងធ្លាក់ខ្លាំងនេះដែរ ធ្វើឲ្យប៉ះពាល់ដល់សេវាកម្មដឹកជញ្ជូន រួមទាំងការបញ្ឈប់សេវាកម្មរថភ្លើង និងរថយន្តក្រុង ។ ជើងហោះហើររាប់សិបវ៉ុលចេញ-ចូលខេត្ត Kagoshima ត្រូវបានលុបចោល ។

រដ្ឋាភិបាលរបស់លោកនាយករដ្ឋមន្រ្តី Shigeru Ishibaបានបង្កើតកងកម្លាំងពិសេសសម្រាប់ការឆ្លើយតបបន្ទាន់ និងការគាំទ្រ ។ 

លោក Ishiba និយាយថា រដ្ឋាភិបាលរបស់លោកនឹងធ្វើអ្វីៗគ្រប់បែបយ៉ាង ដើម្បីការពារអាយុជីវិត និងសុខសុវត្ថិភាពរបស់ប្រជាពលរដ្ឋ ។

ទីភ្នាក់ងារឧតុនិយមជប៉ុន(JMA) បានព្យាករណ៍ថា ភ្លៀងផ្គររន្ទះ នឹងបន្តកើតមានរហូតដល់ថ្ងៃសុក្រនេះ នៅកោះ Kyushu ដោយសារតែប្រព័ន្ធសម្ពាធទាប ។

នៅក្នុងសន្និសីទលើកញ្ចក់ទូរទស្សន៍ជាតិ លោក Shuichi Tachihara គឺជាមន្រ្តីរបស់ទីភ្នាក់ងារ JMA បានព្រមានថា មាននូវហានិភ័យកើនឡើងចំពោះគ្រោះមហន្តរាយធម្មជាតិ ដោយរូបលោកបានជំរុញឲ្យប្រជាពលរដ្ឋរស់នៅក្នុងតំបន់ ត្រូវតែមានការប្រុងប្រយ័ន្ទទុកជាមុន ៕