ប្រទេសចិនបានបង្ហាញពីការមានក្ដីបារម្ភយ៉ាងខ្លាំង នៅថ្ងៃសុក្រ (ទី៨ ខែសីហា) នេះ ជុំវិញផែនការរបស់អ៊ីស្រាអែលដែលចង់គ្រប់គ្រងទីក្រុងហ្កាហ្សា ដោយជំរុញឲ្យបញ្ឈប់សកម្មភាពដ៏គ្រោះថ្នាក់នេះជាបន្ទាន់។

តាមរយៈការផ្ញើសារទៅកាន់បណ្ដាញសារព័ត៌មាន អ្នកនាំពាក្យក្រសួងការបរទេស បានប្រាប់ថា៖ «តំបន់ហ្កាហ្សាជាកម្មសិទ្ធិរបស់ប្រជាជនប៉ាឡេស្ទីន ហើយជាផ្នែកមួយមិនអាចបំបែកបាននៃដែនដីប៉ាឡេស្ទីន»។ សារនោះបានបន្ថែមថា៖ «វិធីដ៏ត្រឹមត្រូវ ដើម្បីបន្ធូរបន្ថយវិបត្តិមនុស្សធម៌ នៅតំបន់ហ្កាហ្សា និងធានាបាននូវការដោះលែងចំណាប់ថ្នូរ គឺការមានបទឈប់បាញ់ភ្លាមៗ»។។

តាមរយៈសារនោះ អ្នកនាំពាក្យបានឲ្យដឹងបន្ថែមថា៖ «ដំណោះស្រាយពេញលេញ ចំពោះជម្លោះនៅតំបន់ហ្កាហ្សា អាស្រ័យលើការមានបទឈប់បាញ់មួយ ពោលគឺអាចជាការបើកផ្លូវតែមួយគត់ ដើម្បីឆ្ពោះទៅរកការបន្ធូរបន្ថយភាពតានតឹង នឹងធានាបាននូវសន្តិសុខ ក្នុងតំបន់»។

នៅក្នុងសេចក្តីថ្លែងការណ៍មួយ នាថ្ងៃសុក្រនេះ ការិយាល័យរបស់នាយកមន្ត្រី បាននិយាយថា យោធារបស់អ៊ីស្រាអែល នឹង «គ្រប់គ្រង» ទីក្រុងហ្កាហ្សា ក្រោមផែនការដែលស្នើឡើងដោយលោកនាយករដ្ឋមន្ត្រី Benjamin Netanyahu និងត្រូវបានអនុម័តដោយគណៈរដ្ឋមន្ត្រីសន្តិសុខរបស់លោក។

គួរបញ្ជាក់ថា IDF (កងកម្លាំងការពារជាតិរបស់អ៊ីស្រាអែល) បានគ្រប់គ្រងរួចហើយលើតំបន់ហ្កាហ្សាប្រហែល ៧៥ភាគរយ ដោយបានធ្វើឲ្យប្រជាជនប៉ាឡេស្ទីនរាប់សែននាក់ជម្លៀសខ្លួន ដែលទីក្រុង និងផ្ទះសម្បែងរបស់ពួកគេ ត្រូវបានបំផ្លិចបំផ្លាញ៕