បាល់ទាត់៖ ពានរង្វាន់បាល់ទាត់ Prince Beer Pre-Season Cup 2022 បានធ្វើការចាប់ឆ្នោតបែងចែកពូលប្រកួតរួចរាល់ហើយដោយមាន ៦ក្រុមចូលរួម និងចែកចេញជា ២ពូលក្នុងនោះពូល A មានក្រុមកងយោធពលខេមរភូមិន្ទ, ភ្នំពេញក្រោន និងគិរីវង់សុខសែនជ័យ ខណៈពូល B មានបឹងកេត វិសាខា និងខេត្តព្រៃវែង។
លោកបណ្ឌិត អាំង សិរីពិសិដ្ឋ ប្រធានគណ:កម្មការប្រតិបត្តិរៀបចំ និងគ្រប់គ្រងការប្រកួតបានថ្លែងក្នុងសន្និសិទសារព័ត៌មានកាលពីល្ងាចថ្ងៃទី១៦ ខែមករា ឆ្នាំ២០២២ ថា ព្រឹត្តិការណ៍នេះនឹងចាប់ផ្ដើមការប្រកួតពីថ្ងៃទី២១ ខែមករាដល់ថ្ងៃទី០២ ខែកុម្ភៈ ឆ្នាំ២០២២ ខាងមុខដោយប្រើប្រាស់ទីលានចំនួន ២ ក្នុងនោះពូល A ប្រកួតនៅកីឡដ្ឋានស្ដាតចាស់ ខណៈពូល B ប្រកួតនៅកីឡដ្ឋានព្រីនស៍។ លោកថា ការប្រកួតលក្ខណៈ Pre-Season ផ្ដោតលើគោលបំណងតែមួយគត់ គឺការផ្ដល់ឱកាសដល់យុវកីឡាគ្រប់បណ្ដាក្លិបសម្រាប់ការរៀបចំ និងត្រៀមខ្លួនចូលរួមការប្រកួតផ្លូវការក្នុងក្របខណ្ឌលីគកំពូលកម្ពុជា និងពានរង្វាន់សម្ដេចតេជោ ហ៊ុន សែន រដូវកាលថ្មីឆ្នាំ២០២២។ ដូច្នេះលោករំពឹងថា ការប្រកួតនេះនឹងរួមចំណែកជួយឲ្យក្រុមនីមួយៗ រៀបចំខ្លួនបានកាន់តែប្រសើរសម្រាប់ត្រៀមការប្រកួតផ្លូវការនាពេលខាងមុខ។
ការប្រកួតនេះនឹងប្រើរូបមន្ដប្រកួតសន្សំពិន្ទុវិលជុំ ហើយក្រុមមានពិន្ទុខ្ពស់ជាងគេ ២ក្រុមនឹងឡើងទៅប្រកួតខ្វែងនៅវគ្គពាក់កណ្ដាលផ្ដាច់ព្រ័ត្រ ហើយក្រុមឈ្នះនឹងបន្ដឡើងវគ្គផ្ដាច់ព្រ័ត្រ។ ចំពោះប្រាក់រង្វាន់ជ័យលាភី ក្រុមជើងឯកនឹងទទួលបាន ៣ពាន់ដុល្លារ ខណៈលេខ២ នឹងទទួលបាន ២ពាន់ដុល្លារ។ រីឯអ្នកចាំទីល្អ និងកីឡាករស៊ុតបញ្ចូលទីច្រើនជាងគេក៏នឹងទទួលបានប្រាក់រង្វាន់ ៥០០ដុល្លារដូចគ្នាផងដែរ៕
អត្ថបទ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
