អាជ្ញាធរ នាថ្ងៃសុក្រ (ទី៨ ខែសីហា) នេះ បានប្រាប់ឲ្យដឹងថា ចំហេះព្រៃ នៅតំបន់ភ្នំភាគខាងជើងនៃទីក្រុង Los Angeles (LA) បានបង្កឲ្យមានការជម្លៀសអ្នកស្រុកចេញពីតំបន់ចំនួន ២ របស់សហរដ្ឋអាមេរិក បន្ទាប់ពីអណ្ដាតភ្លើងបានឆាបឆេះរាលដាលផ្ទៃដីជិត ២.០០០ហិកតា។

អ្នកនាំពាក្យនាយកដ្ឋានពន្លត់អគ្គិភ័យតំបន់ Ventura លោក Andrew Dowd បានប្រាប់ប្រព័ន្ធផ្សព្វផ្សាយថា យ៉ាងហោចណាស់តំបន់ចំនួន ១០ ទាំងនៅក្នុងទីក្រុង Los Angeles និង Ventura ស្ថិតក្រោមការបញ្ជាជម្លៀស ដោយមានអ្នកស្រុក ២.៧០០នាក់ ត្រូវបានផ្លាស់ទីលំនៅ គិតត្រឹមម៉ោង ១១យប់ថ្ងៃព្រហស្បតិ៍ (ម៉ោងក្នុងស្រុក)។ យោងតាមលោក Dowd បានឲ្យដឹងទៀតថា យ៉ាងហោចណាស់បុគ្គលិក ៤០០នាក់ ត្រូវបានដាក់ពង្រាយ ដើម្បីពន្លត់អគ្គិភ័យ។

ចំហេះនេះ បានចាប់ផ្ដើមមានឡើង ខណៈដែលក្រុមអ្នកពន្លត់អគ្គិភ័យ បានប្រយុទ្ធនឹងការឆាបឆេះព្រៃដាច់ដោយឡែកផ្សេងទៀត ដែលមកទល់ពេលនេះ គឺជាអគ្គិភ័យដ៏ធំបំផុតរបស់រដ្ឋ California នៅឆ្នាំនេះ ដោយបានរាលដាលរយៈពេល ៨ថ្ងៃជាប់គ្នា និងបានលេបត្របាក់ផ្ទៃដីជាង ៤.០០០ហិកតា នៅក្នុងព្រៃជាតិ Los Padres ដែលបង្កហានិភ័យដល់ផ្ទះសម្បែងរាប់រយខ្នង។

ជាមួយគ្នានេះ លោក Dowd បានបញ្ជាក់ថា រហូតមកដល់ពេលនេះ អណ្ដាតភ្លើងចុងក្រោយនេះ បានឆាបឆេះផ្ទៃដីអស់ចំនួន ១.៩៦៥ហិចតា ហើយការគ្រប់គ្រងស្ថានភាពចំហេះ គឺសូន្យភាគរយនៅឡើយ។ ចំណែកអ្នកគ្រប់គ្រងតំបន់របស់ LA លោកស្រី Kathryn Barger ដែលតំណាងឲ្យតំបន់នោះ បានជំរុញឲ្យអ្នកស្រុកគោរពតាមគោលការណ៍ណែនាំអំពីការជម្លៀស៕