​ហ្វីលីពីន៖ រដ្ឋមន្ត្រីការបរទេស​ហ្វីលីពីន​បាន​និយាយ​កាលពី​ថ្ងៃអាទិត្យ​ថា មេដឹកនាំ​សហភាព​មី​យ៉ាន់​ម៉ា​ដែល​ត្រូវ​បាន​ទម្លាក់​ចេញពី​តំណែង​គឺ​លោកស្រី Aung San Suu Kyi គឺជា​បុគ្គល​មិន​អាច​ខ្វះ​បាន​ក្នុង​ដំណើរការ​ស្ដារ​លទ្ធិ​ប្រជាធិបតេយ្យ​ឡើងវិញ​ នៅ​ក្នុង​ប្រទេស​ដែល​គ្រប់គ្រង​ដោយ​របប​សឹក​មួយ​នេះ និង​ចាំបាច់​ត្រូវ​បញ្ចូល​លោកស្រី​នៅ​ក្នុង​ការចរចា​ស្វែងរក​សន្តិភាព​នានា បោះបង់ចោល​ការ​កាត់​ទោស​លោកស្រី​។

​នៅ​ក្នុង​ការស្តីបន្ទោស​យ៉ាងខ្លាំង​ទៅលើ​របប​យោធា​មី​យ៉ាន់​ម៉ា​ ដែល​បាន​ផ្តួលរំលំ​រដ្ឋាភិបាល​ជាប់ឆ្នោត​របស់លោក​ស្រី Suu Kyi កាលពី​ឆ្នាំមុន លោក Teodoro Locsin បាន​ថ្កោលទោស​ការ​កាត់ទោស​កាល​ពី​សប្តាហ៍​មុន​លើ​ម្ចាស់​ជ័យលាភី​ណូបែល​សន្តិភាព ហើយ​បាន​ចោទប្រកាន់​យោធា​ថា ​បាន​ប្រើប្រាស់​ប្រព័ន្ធតុលាការ​ដើម្បី​កំទេច​គូប្រជែង​របស់ខ្លួន​។​ ​លោក Locsin បាន​និយាយថា លោក​នឹង "​ទទួលយក​" សុន្ទរកថា​របស់​រដ្ឋ​មន្ត្រី​ការបរទេស​ន័​រវេ​សលោកស្រី Anniken Huitfeldt ក្នុងការ​ទាមទារ​ឱ្យ​របប​យោធា​ដោះលែង​អ្នកទោសនយោបាយ បញ្ឈប់​អំពើហិង្សា និង​ការគោរព​សិទ្ធិមនុស្ស​។

​លោក Locsin បាន​និយាយ​នៅក្នុង​សេចក្តីថ្លែងការណ៍​មួយ​ថា "​ខ្ញុំ​មានការ​ព្រួយបារម្ភ​យ៉ាងខ្លាំង​អំពី​ការឈឺចាប់​របស់​ប្រជាជន​ស៊ីវិល​" ។ យើង​ក៏​អំពាវនាវ​ឱ្យ​ថ្នាក់ដឹកនាំ​យោធា​ចូលរួម​ក្នុង​កិច្ចសន្ទនា​រួម និង​បន្តដំណើរ​ការផ្លាស់ប្តូរ​ប្រជាធិបតេយ្យ​ឡើងវិញ​។​ ​កាលពី​ថ្ងៃទី​១០​មករាកន្លងទៅ​ថ្មីៗ​នេះ តុលាការ​ក្នុង​សហភាព​មី​យ៉ាន់​ម៉ា​បាន​កាត់ទោស​លោកស្រី Aung San Suu Kyi ឲ្យ​ជាប់ពន្ធនាគារ​ ៤​ឆ្នាំ​បន្ថែមទៀត បន្ទាប់ពី​រកឃើញថា លោកស្រី​បាន​នាំចូល​វិទ្យុ​ទាក់​ទាង​ដោយ​ខុសច្បាប់ និង​បំពាន​វិធានការ​រឹតត្បិត​ទប់ស្កាត់​ការចម្លង​វីរុស​កូ​រ៉ូ​ណា​៕

អត្ថបទ៖ សុខមាន