ទូរទស្សន៍រដ្ឋចិន CCTV រាយការណ៍នៅថ្ងៃសុក្រនេះថា មនុស្សយ៉ាងហោច ១០នាក់ បានស្លាប់ និងមនុស្ស ៣៣នាក់ផ្សេងទៀត កំពុងបាត់ខ្លួន ក្រោយទឹកជំនន់ដ៏គំហុកបានវាយប្រហារតំបន់ជាច្រើននៅខេត្តភាគពាយព័្យ Gansu ប្រទេសចិន ។

ទឹកជំនន់បង្កឡើងដោយសារភ្លៀងធ្លាក់ខ្លាំងឥតឈប់ឈរ បានចាប់ផ្តើមកាលពីថ្ងៃព្រហស្បតិ៍ ទី ៧ ខែសីហាម្សិលមិញ ធ្វើឲ្យប៉ះពាល់ដល់តំបន់ជាច្រើននៅក្នុងខេត្ត Gansu ជាមួយនឹងការកញ្ជ្រោលឡើងទឹកជំនន់ នាំឲ្យមានគ្រោះថ្នាក់ និងការខូចខាតទ្រង់ទ្រាយធំ ។

CCTV រាយការណ៍ថា មកទល់នឹងវេលាម៉ោង ៣ និង ៣០នាទីរសៀល ម៉ោងក្នុងស្រុក ថ្ងៃសុក្រនេះ មនុស្ស ១០នាក់ បានស្លាប់ និងមនុស្ស ៣៣នាក់ផ្សេងទៀត កំពុងបាត់ខ្លួន ។

ប្រធានាធិបតីចិនលោក Xi Jinping អំពាវនាវឲ្យមានកិច្ចខិតខំខ្លាំងបំផុត នៅក្នុងប្រតិបត្តិការជួយសង្រ្គោះកំពុងបន្ត ហើយនិងជំរុំឲ្យតំបន់ទាំងអស់ ត្រូវតែកំណត់គោលដៅឲ្យបានច្បាស់លាស់បំផុត នៅក្នុងការត្រៀមខ្លួនគ្រោះមហន្តរាយ ស្របពេលកើតមានអាកាសធាតុអាក្រក់ញឹកញាប់ ។

បច្ចុប្បន្ន កិច្ចខិតខំជួយសង្រ្គោះ កំពុងធ្វើឡើង ក្នុងនោះក្រុមឆ្លើយតបគ្រាអាសន្នកំពុងស្វែងរកមនុស្សបាត់ខ្លួន និងផ្តល់ការជួយសង្រ្គោះដល់តំបន់រងផលប៉ះពាល់ ។

ក្រុមអាជ្ញាធរនៅពុំទាន់បានបញ្ចេញរឿងរ៉ាវលម្អិតនៃអត្តសញ្ញាណជនរងគ្រោះនោះទេ ឬបញ្ជាក់ទីតាំងរងផលប៉ះពាល់ខ្លាំងបំផុត ៕