លោក Datuk Seri Anwar Ibrahim ប្រាប់ឲ្យដឹងថា មេដឹកនាំពិភពលោកធំៗចំនួន ៤រូប ត្រូវបានរំពឹងថា នឹងចូលរួមកិច្ចប្រជុំកំពូលអាស៊ានលើកទី៤៧ ដែលគ្រោងនឹងធ្វើឡើងនៅទីក្រុងកូឡាឡាំពួរ ក្នុងខែតុលាខាងមុខនេះ។

លោកនាយករដ្ឋមន្រ្តីម៉ាឡេស៊ី បានបញ្ជាក់ថា កិច្ចប្រជុំនេះនឹងជួបជុំសុទ្ធតែមេដឹកនាំពិភពលោកដ៏មានកិត្យានុភាពបំផុត ហើយនឹងធានាថា ព្រឹត្តិការណ៍នេះនឹងផ្តល់លទ្ធផលដ៏មានតម្លៃយូរអង្វែង។ លោក Anwar បានថ្លែងថា៖ «យើងទន្ទឹងរង់ចាំស្វាគមន៍ប្រមុខរដ្ឋាភិបាលតំបន់អាស៊ាន និងដៃគូសន្ទនា ដែលក្នុងនោះរួមមានទាំងប្រធានាធិបតីអាមេរិក លោក Donald Trump ហើយខ្ញុំជឿជាក់ថា ប្រធានាធិបតីចិន លោក Xi Jinping ក៏នឹងវត្តមានផងដែរ»។

ហើយអំឡុងពេលថ្លែងសុន្ទរកថា ក្នុងឱកាសប្រារព្ធទិវាអាស៊ានលើកទី៥៨ នៅសាល Cyber Event Hall នាថ្ងៃសុក្រ (ទី៨ ខែសីហា) នេះ លោក Anwar បានប្រាប់បន្ថែមថា៖ «លើសពីនេះទៀត យើងបានទទួលការចង្អុលបង្ហាញជាវិជ្ជមាន អំពីការចូលរួមរបស់ប្រធានាធិបតីប្រេស៊ីល លោក Luiz Inacio Lula da Silva និងប្រធានាធិបតីអាហ្វ្រិកខាងត្បូង លោក Cyril Ramaphosa ដែលបច្ចុប្បន្នកាន់តំណែងជាប្រធានាធិបតី BRICS និង G20 រៀងៗខ្លួន»។

តែយ៉ាងណាក្ដី លោក Anwar បានសង្កត់ធ្ងន់ថា៖ «ប៉ុន្តែការធានានូវការមានវត្តមានរបស់មេដឹកនាំនោះ គឺគ្រាន់តែជាជំហានដំបូងប៉ុណ្ណោះ។ ការសាកល្បងធំជាងនេះ គឺការធានាឲ្យបានថា មេដឹកនាំទាំងអស់ចាកចេញពីប្រទេសម៉ាឡេស៊ី និងកិច្ចប្រជុំអាស៊ាន ជាមួយនឹងការមានអារម្មណ៍ថា ការចំណាយពេលវេលារបស់ពួកលោក គឺបានផលល្អប្រសើរ។ យើងត្រូវតែធានាថា ដំណើរទស្សនកិច្ចរបស់ពួកគាត់ផ្តល់ជាលទ្ធផលដ៏មានតម្លៃយូរអង្វែង។ ក្រសែភ្នែករបស់ពិភពលោកនឹងសម្លឹងមកពួកយើង ហេតុដូច្នេះ យើងត្រូវតែប្រឹងប្រែងធ្វើឲ្យបានល្អបំផុត ក្នុងឱកាសនេះ»៕