លោក Nabil Abu Rudeineh គឺជាអ្នកនាំពាក្យប្រធានអាជ្ញាធរប៉ាឡេស្ទីនលោក Mahmoud Abbas បានធ្វើការច្រានចោលទាំងស្រុងការសម្រេចចិត្តរបស់អ៊ីស្រាអែលក្នុងការគ្រប់គ្រងទីក្រុងហ្កាហ្សា របស់ប៉ាឡេស្ទីន ។

គួរឲ្យដឹងថា គណៈរដ្ឋមន្រ្តីនយោបាយ-សន្តិសុខអ៊ីស្រាអែល បានអនុម័តផែនការគ្រប់គ្រងទីក្រុងហ្កាហ្សា ជាការបង្កើនប្រតិបត្តិការយោធារបស់ខ្លួន បើទោះបីជាមានការរិះគន់យ៉ាងខ្លាំងក្លា ទាំងនៅក្នុងប្រទេស និងនៅលើឆាកអន្តរជាតិ ជុំវិញសង្រ្គាមដ៏ខ្ទេចខ្ទាំអស់រយៈពេលជិត ២ឆ្នាំនេះក៏ដោយ ។

លោក Rudeineh និយាយថា ពួកយើងសូមធ្វើការព្រមានរដ្ឋាភិបាលអ៊ីស្រាអែលម្តងហើយម្តងទៀតពីផលវិបាកនៃវិធានការទាំងនេះ ដែលនឹងពុំធ្វើឲ្យមានសន្តិសុខ សន្តិភាព និងស្ថិរភាពនោះទេ ។

លោកបន្តថា រដ្ឋាភិបាលអ៊ីស្រាអ៊ែលបន្តសង្រ្គាមសម្លាប់រង្គាល និងការផ្លាស់ទីលំនៅប្រឆាំងជនប៉ាឡេស្ទីន ដោយផ្គើនជាមួយជនប៉ាឡេស្ទីន និងប្រជាជាតិអារ៉ាប់ ហើយមិនយកចិត្តទុកដាក់ចំពោះការទទួលស្គាល់របស់ប្រទេសមហាអំណាចធំៗនៅលើពិភពលោក ដែលបានជួបប្រជុំគ្នានៅទីក្រុងញូវយ៉ក ។

លោក Rudeineh និយាយទៀតថា ពួកយើងសូមឲ្យរដ្ឋបាលអាមេរិកទទួលខុសត្រូវក្នុងការទប់ស្កាត់គោលនយោបាយអ៊ីស្រាអែល ពិព្រោះថា សេចក្តីថ្លែងការណ៍អាមេរិកមានតែជំរុញអ៊ីស្រាអែលឲ្យបន្តសង្រ្គាមមួយប៉ុណ្ណោះ ៕