ជនប៉ាឡេស្ទីនរស់នៅទីក្រុងហ្កាហ្សា បានបង្ហាញការខកចិត្តរបស់ពួកគេចំពោះព័ត៌មានថា គណៈរដ្ឋមន្រ្តីសន្តិសុខអ៊ីស្រាអែល បានអនុម័តផែនការដណ្តើមគ្រប់គ្រងទីក្រុងហ្កាហ្សា គឺជាចំណាត់ការមួយដើម្បីបង្កើនប្រតិបត្តិការយោធារបស់ពួកគេនៅដែនដីប៉ាឡេស្ទីនមួយនេះ ។

អ្នកស្រី Sabrin Naaim ដែលបានជម្លៀសខ្លួនច្រើនលើកច្រើនសារ អំឡុងសង្រ្គាមមួយនេះ ហើយបច្ចុប្បន្នរស់នៅទីក្រុងហ្កាហ្សា និយាយថា អ្នកស្រីពុំដឹងថាតើកន្លែងណាទៀតដែលគាត់គួរទៅបន្តនោះទេ ។

អ្នកស្រីនិយាយថា ទីនោះពួកយើងរស់នៅក្នុងសំពត់តង់ ហើយនៅទីនេះពួកយើងរស់នៅក្នុងសំពត់តង់ ហើយបើសិនជាពួកយើងត្រឡប់ទៅវិញ ពួកយើងនឹងត្រូវរស់នៅក្នុងសំពត់តង់ដដែល ។ ជីវិតរបស់ពួកយើងទាំងមូល តើពួកយើងនឹងត្រូវរស់នៅក្នុងសំពត់តង់ដល់ពេលណាទៀត?

សម្ព័ន្ធមិត្តនិយមស្តាំជ្រុលនៅក្នុងរដ្ឋាភិបាលចម្រុះរបស់លោកនាយករដ្ឋមន្រ្តី Benjamin Netanyahu បាននឹងកំពុងជំរុញឲ្យដណ្តើមគ្រប់គ្រងតំបន់ហ្កាហ្សាទាំងមូល ដែលជាផ្នែកមួយនៃការសន្យារបស់លោក ក្នុងការកម្ចាត់ក្រុមជីវពលហាម៉ាស់ បើទោះបីជាយោធាព្រមានថា វាអាចនឹងបង្កគ្រោះថ្នាក់ដល់អាយុជីវិតរបស់ចំណាប់ថ្នូរសេសសល់ក៏ដោយ ។

លោក Netanyahu និយាយកាលពីថ្ងៃព្រហស្បតិ៍ថា អ៊ីស្រាអែលមានបំណងឲ្យយោធាគ្រប់គ្រងតំបន់ហ្កាហ្សាទាំងមូល ផែនការត្រូវបានអនុម័តនៅថ្ងៃសុក្រនេះ ផ្តោតពិសេសលើការគ្រប់គ្រងទីក្រុងហ្កាហ្សា ដែលជាទីក្រុងធំបំផុតនៅក្នុងដែនដីប៉ាឡេស្ទីនមួយនេះ ស្ថិតនៅភាគខាងជើង ៕