​បាល់ទាត់៖ ​ក្រុម​ការពារ​តំណែង​ជើងឯក​បាល់ទាត់​ទ្វីបអាហ្វ្រិក Africa Cup of Nations អាល់​ហ្សេ​រី​ប្រឈម​នឹង​ធ្លាក់​ត្រឹម​វគ្គ​វិលជុំ​ក្នុង​ពូ​ល ​ក្រោយ​ចាញ់​ក្រុម​អេក្វាទ័រ​ហ្គី​ណេ​មិន​គួរឱ្យ​ជឿ​ក្នុង​ប្រកួត​ទី២ នៃ​ពូ​ល E​។ ​​កីឡាករ​កូន​កាន់​អេ​ស្ប៉ា​ញ Esteban Obiang គឺជា​អ្នកសំរេច​គ្រាប់​បាល់​ជ័យជំនះ​ឱ្យ​អេក្វាទ័រ​ហ្គី​ណេ​នៅ​នាទី​ទី៧០​។

នេះ​ជា​បរាជ័យ​ដំបូង​របស់​អាល់​ហ្សេ​រី​ក្នុង ៣៥ប្រកួត​ជាប់​គ្នា​មិនអាច​បំបែក​កំណត់ត្រា​របស់​អ៊ីតាលី​បាន​ដែល​ឈ្នះ ៣៧ប្រកួត​ជាប់​គ្នា​។ ក្រោយ​លេង​បាន​ពីរ​ប្រកួត​ក្នុង​ពូ​ល E នេះ​អាល់​ហ្សេ​រី​មាន​ត្រឹម ១ពិន្ទុ​ប៉ុណ្ណោះ​បានមកពី​ស្មើ​ប្រកួត​ដំបូង​ទល់នឹង​សា​រ៉ា​ឡេ​អុង ហើយ​ត្រូវការ​ជ័យជំនះ​ដាច់ខាត​ដើម្បី​ឡើង​វគ្គ​បន្ត​នៅពេល​ជួប​កូ​ឌី​វ័រ​ប្រកួត​ចុងក្រោយ​។ ​កូ​ឌី​វ័រ​យប់មិញ​បាន​ត្រឹម​ស្មើ​ជាមួយ​សា​រ៉ា​ឡេ​អុង ២-២ ខក​ឱកាស​ឡើង​វគ្គ​បន្ត​ដោយ​ស្វ័យប្រវត្តិ​។​ ​ខ្សែប្រយុទ្ធ Ajax, Sebastian Haller បើក​ការ​នាំមុខ​ឱ្យ​កូ​ឌី​វ័រ​នៅ​នាទី​ទី២៥ មុនពេល​ដែល​សា​រ៉ា​ឡេ​អុង​តាម​ស្មើ​នៅ​នាទី​ទី៥៥ ដោយ Musa Noah Kamara​។

​​ក្រោយមក​កីឡាករ​របស់ Arsenal, Nicolas Pepe ក៏​រកបាន​គ្រាប់​នាំមុខ​សារជាថ្មី​នៅ​នាទី​ទី៦៥ តែ​មិន​មែន​ជា​គ្រាប់​ជ័យជំនះ​ឡើយ​ដោយ Alhaji Kamara តាម​ស្មើ​វិញ​បានសំរេច​នៅ​នាទី​ទី៩០+៣ ទៅ​ហើយ​។ ​កូ​ឌី​វ័រ​បន្ត​ឈរលើ​គេ​ក្នុង​ពូ​ល E នេះ​មាន ៤ពិន្ទុ​ ខណៈ​អេក្វាទ័រ​ហ្គី​ណេ​លេខ២ មាន ៣ពិន្ទុ, សា​រ៉ា​ឡេ​អុង​លេខ៣ មាន ២ពិន្ទុ និង​អាល់​ហ្សេ​រី​ក្រោម​គេ​មាន ១ពិន្ទុ​។ ​ចំណែក​ការប្រកួត​ក្នុង​ពូ​ល F ទុយ​នេ​ស៊ីរកបាន​ជ័យជំនះ​ដំបូង​ក្រោយ​យកឈ្នះ​ម៉ា​វ​រី​តានី ៤-០ ដើម្បី​ឡើងមក​លេខ៣ ក្នុង​ពូ​ល​មាន ៣ពិន្ទុ ​ខណៈហ្កាំ​ប៊ី និង​ម៉ាលី​ស្មើគ្នា ១-១ បន្ត​ឈរ​លេខ១ និង​លេខ២ ក្នុង​ពូ​ល​។ ​ប្រកួត​ចុងក្រោយ​ក្នុង​ពូ​ល F នេះ​ទុយ​នេ​ស៊ី​ជួប​ហ្កាំ​ប៊ី​ ខណៈ​ម៉ាលី​ជួប​ម៉ា​វ​រីតា​នី​៕

​អត្ថបទ​៖​នាង សុភា​វុ​ធ