នាយករដ្ឋមន្ត្រីឥណ្ឌា លោក Narendra Modi បាននិយាយកាលពីថ្ងៃសុក្រថា លោកមានការសន្ទនា «ដ៏ល្អប្រសើរ» ជាមួយប្រធានាធិបតីរុស្ស៊ី លោក Vladimir Putin ក្នុងអំឡុងពេលដែលមេដឹកនាំទាំងពីរបានពិភាក្សាអំពីសង្គ្រាមនៅអ៊ុយក្រែន និងវិធីពង្រឹងទំនាក់ទំនងទ្វេភាគី។ ការសន្ទនាតាមទូរស័ព្ទបានធ្វើឡើងនៅពេលដែលលោក Modi ដែលជាមេដឹកនាំនៃប្រទេសដែលមានប្រជាជនច្រើនបំផុតនៅលើពិភពលោក និងជាប្រទេសមហាអំណាចសេដ្ឋកិច្ចទីប្រាំ ប្រឈមនឹងការសម្រេចចិត្តដ៏លំបាករបស់ទីក្រុងញូវឌេលី ជុំវិញការទិញប្រេងពីរុស្ស៊ី។ ប្រធានាធិបតីសហរដ្ឋអាមេរិក លោក Donald Trump បានផ្តល់ពេលឱ្យប្រទេសឥណ្ឌាដែលជាប្រទេសនាំចូលប្រេងឆៅធំបំផុតមួយរបស់ពិភពលោករយៈពេល៣សប្តាហ៍ដើម្បីស្វែងរកអ្នកផ្គត់ផ្គង់ជំនួស បើមិនដូច្នេះទេត្រូវប្រឈមនឹងការដំឡើងពន្ធនាំចូលថ្មីរហូតដល់៥០ភាគរយ ដែលកើនឡើងពី២៥ភាគរយនាពេលបច្ចុប្បន្ន។ លោក Modi បានបង្ហោះនៅលើបណ្តាញផ្សព្វផ្សាយសង្គមថា «មានការសន្ទនាដ៏ល្អ និងលម្អិតជាមួយមិត្តរបស់ខ្ញុំគឺលោកប្រធានាធិបតី Putin។ «ខ្ញុំទន្ទឹងរង់ចាំធ្វើជាម្ចាស់ផ្ទះទទួលលោកប្រធានាធិបតីPutin នៅប្រទេសឥណ្ឌា នៅចុងឆ្នាំនេះ»។ 

ការទិញប្រេងពីរុស្ស៊ី បានជួយសន្សំប្រាក់រាប់ពាន់លានដុល្លារដែលឥណ្ឌាចំណាយលើការនាំចូល ដោយរក្សាតម្លៃប្រេងឥន្ធនៈក្នុងស្រុកមានស្ថិរភាព ប៉ុន្តែអត្ថប្រយោជន៍នោះ ពេលនេះកំពុងស្ថិតក្រោមការគំរាមកំហែងដោយសារតែការដំឡើងពន្ធគយរបស់លោក Trump ។ ការទិញប្រេងគឺជាប្រភពចំណូលដ៏សំខាន់សម្រាប់សង្គ្រាមរបស់ទីក្រុងមូស្គូ នៅអ៊ុយក្រែន។ រុស្ស៊ី ក៏ជាប្រទេសផ្គត់ផ្គង់អាវុធកំពូលមួយរបស់ឥណ្ឌាផងដែរ ហើយទំនាក់ទំនងដ៏កក់ក្តៅរវាងប្រទេសទាំងពីរមានតាំងពីសម័យសូវៀត។ លោកPutin បានធ្វើទស្សនកិច្ចចុងក្រោយនៅប្រទេសឥណ្ឌានៅក្នុងខែធ្នូ ឆ្នាំ២០២១។ វិមានក្រឹមឡាំងបានរិះគន់ការអំពាវនាវដើម្បី «បង្ខំឱ្យប្រទេសនានា កាត់ផ្តាច់ទំនាក់ទំនងពាណិជ្ជកម្ម» ជាមួយរុស្ស៊ី ថាជារឿង «ខុសច្បាប់» ដោយមិនបាននិយាយដោយផ្ទាល់ដល់លោក Trump នោះទេ។