ភាពអត់ឃ្លាន និងជំងឺកំពុងរាលដាលនៅក្នុងប្រទេសស៊ូដង់ដែលហែកហួរដោយសង្រ្គាម ខណៈគ្រោះទុរ្ភិក្សមានរួចទៅហើយនៅក្នុងតំបន់មួយចំនួន។ អង្គការសុខភាពពិភពលោកបាននិយាយកាលពីថ្ងៃសុក្រថា មនុស្ស២៥លាននាក់ជួបប្រទះអសន្តិសុខស្បៀងធ្ងន់ធ្ងរ។ 

មន្ត្រីសង្គ្រោះបន្ទាន់ជាន់ខ្ពស់ម្នាក់របស់អង្គការសុខភាពពិភពលោកបាននិយាយថា «អំពើហិង្សាឥតឈប់ឈរ បានរុញច្រានប្រព័ន្ធសុខភាពរបស់ប្រទេសស៊ូដង់ដល់មាត់ជ្រោះ ដោយបន្ថែមលើវិបត្តិ ភាពអត់ឃ្លាន ជំងឺ និងភាពអស់សង្ឃឹម»។ 

ជម្លោះនៅប្រទេសស៊ូដង់ រវាងកងទ័ព និងគូប្រជែងកងកម្លាំងគាំទ្ររហ័ស បានជម្លៀសមនុស្សរាប់លាននាក់ និងបំបែកប្រទេសទៅជាតំបន់គ្រប់គ្រងដោយគូប្រជែង។

ការកាត់បន្ថយការផ្តល់មូលនិធិកំពុងរារាំងដល់ជំនួយមនុស្សធម៌ ហើយជំងឺអាសន្នរោគក៏កំពុងរាលដាល។ មន្ត្រីដដែលនិយាយថា «ជំងឺអាសន្នរោគ បានរាលដាលពាសពេញប្រទេសស៊ូដង់ ដោយរដ្ឋទាំងអស់បានរាយការណ៍ពីការផ្ទុះឡើងជំងឺនេះ។ ជិត១សែនករណី ត្រូវបានរាយការណ៍ចាប់តាំងពីខែកក្កដាឆ្នាំមុន។ ជំងឺអាសន្នរោគ បានវាយលុកនៅជំរំសម្រាប់ជនភៀសខ្លួនស៊ូដង់នៅភាគខាងកើតប្រទេសឆាដ។

អង្គការ UNHCR បាននិយាយនៅក្នុងសេចក្តីប្រកាសព័ត៌មានថា ខ្លួនកំពុងអំពាវនាវឱ្យមានការផ្តល់មូលនិធិជាបន្ទាន់សម្រាប់សុខភាព អនាម័យ ទឹក ទីជម្រក និងជំនួយស្បៀងអាហារ ដើម្បីទប់ស្កាត់ «មហន្តរាយសុខភាព»។