​សហរដ្ឋអាមេរិក៖ ចំនួន​ពាក់កណ្ដាល​នៃ​ប្រជាពលរដ្ឋ​ដែល​ត្រូវបាន​ស្ទង់​មតិ នៅក្នុង​ការស្ទង់មតិ​ថ្មី​របស់​សារព័ត៌មាន CBS News កាលពី​ថ្ងៃអាទិត្យ​និយាយ​ថា ពួកគេ​មិន​ពេញចិត្ត​នឹង​ការ​កាន់​តំណែង​ជា​ប្រធានាធិបតី​របស់​លោក Joe Biden ទេ ប៉ុន្មាន​ថ្ងៃ​មុន​ពេល​លោក​ប្រារព្ធ​ពិធី​ឡើង​កាន់​តំណែង​ពេញ​មួយ​ឆ្នាំ​លើកដំបូង​។

​នៅ​ពេល​ត្រូវ​បាន​សួរ​នៅ​ក្នុង​ការស្ទង់មតិ​ថ្មី​ថា​ តើ​ការ​ឡើង​កាន់​តំណែង​ជា​ប្រធានាធិបតី​របស់​លោក Biden ធ្វើ​ឲ្យ​ពួកគេ​មាន​អារម្មណ៍​បែប​ណា អ្នក​ឆ្លង​តប​ចំនួន​ពាក់កណ្ដាល​បាន​និយាយ​ថា ពួកគេ​មិន​ពេញចិត្ត និង​ខកចិត្ត។ ជាង​នេះ​ទៅ​ទៀត​ប្រមាណ ៤០%​ និយាយ​ថា ការ​កាន់​តំណែង​ជា​ប្រធានាធិបតី​របស់​លោក​បាន​ធ្វើ​ឲ្យ​ពួកគេ​ភិតភ័យ ខណៈ​ដែល​ ១/៤ នៃ​អ្នក​ឆ្លើយតប​ទាំងនោះ​និយាយ​ថា Biden​ បាន​ធ្វើ​ឲ្យ​អារម្មណ៍​ពួកគេ​ស្ងប់ និង​ពេញចិត្ត​។ ​សរុប​មក អ្នក​ឆ្លើយតប​នៅ​ក្នុង​ការស្ទង់មតិ​របស់​សារព័ត៌មាន CBS News ទំនង​ជា​មាន​សុទិដ្ឋិនិយម​តិចតួចចំពោះ​ស្ថានភាព​បច្ចុប្បន្ន​នៅ​ក្នុង​ប្រទេស​នេះ​។

​មនុស្ស​ភាគច្រើន​និយាយ​ថា ពួកគេ​មិន​ឯកភាព​នូវ​អ្វីដែល​លោក Biden កំពុង​ដោះស្រាយលើ​បញ្ហា​សេដ្ឋកិច្ច ការ​ធ្វើ​អន្តោប្រវេសន៍ ទំនាក់ទំនង ឧក្រិដ្ឋកម្ម អតិផរណា គោលនយោបាយ និង​បញ្ហា​នៅ​អា​ហ្វ​ហ្គា​នី​ស្ថាន​ជាដើម។ ពួកគេ​ក៏​ទំនងជា​បាន​បាត់បង់​ទំនុក​ចិត្ត​លើ​ការ​ដោះស្រាយ​របស់​លោក Biden អំពី​វីរុស​រាតត្បាត​សកល COVID-19 ផង​ដែរ៕

អត្ថបទ៖ សុខមាន