ក្រុមអ្នកតវ៉ាប្រឆាំងអន្តោប្រវេសន៍ និងក្រុមអ្នកតវ៉ាប្រឆាំងការរើសអើងជាតិសាសន៍រាប់សិបនាក់ បានប្រឈមមុខដាក់គ្នានៅខាងក្រៅសណ្ឋាគារពីរកន្លែងនៅក្នុងទីក្រុងឡុងដ្រ៍ ចក្រភពអង់គ្លេស ដែលត្រូវបានប្រើប្រាស់ផ្តល់កន្លែងស្នាក់នៅដល់អ្នកស្វែងរកសិទ្ធិជ្រកកោន កាលពីល្ងាចថ្ងៃសុក្រ ទី៨ ខែសីហា។ ក្រុមអ្នកតវ៉ា ដែលគាំទ្រជនអន្តោប្រវសេន៍មានចំនួនច្រើនជាងអ្នកដែលស្រែកថា «បញ្ឈប់ទូក» ដោយសំដៅទៅលើទូកតូចៗដែលជនអន្តោប្រវេសន៍ប្រើប្រាស់ដើម្បីទៅដល់ឆ្នេរប្រទេសអង់គ្លេស។

នគរបាលទីក្រុង បាននិយាយថា បាតុករពីរនាក់ត្រូវបានចាប់ខ្លួននៅខាងក្រៅសណ្ឋាគារ Britannia ក្នុង តំបន់ Canary Wharf ម្នាក់ចាប់ខ្លួនពីបទគប់សំបកដប និងម្នាក់ទៀតមិនព្រមដោះរបាំងមុខ។ ការតវ៉ានៅខាងក្រៅសណ្ឋាគារផ្តល់កន្លែងស្នាក់នៅដល់អ្នកស្វែងរកសិទ្ធិជ្រកកោន បានផ្ទុះឡើងនៅទូទាំងប្រទេស ក្នុងខែកក្កដា។

មនុស្សជាង២៥.០០០នាក់បានទៅដល់ប្រទេសអង់គ្លេសតាមទូកតូចៗរហូតមកដល់ពេលនេះក្នុងឆ្នាំ ២០២៥នេះ ហើយនាយករដ្ឋមន្ត្រី លោក Keir Starmer បានសន្យាថានឹង «កម្ទេចក្រុមជនអន្ធពាល» នៃក្រុមអ្នករត់ពន្ធមនុស្ស ដើម្បីព្យាយាមកាត់បន្ថយចំនួនអ្នកទៅដល់។