ក្រុមអ្នកស្ម័គ្រចិត្ត បាននិយាយកាលពីថ្ងៃសុក្រថា យ៉ាងហោចណាស់ជនស៊ីវិល ១៦នាក់ បានស្លាប់ និង ៨ នាក់ផ្សេងទៀត បានរងរបួស នៅក្នុងការវាយប្រហារដោយកងកម្លាំងប្រដាប់អាវុធរហ័ស (RSF) ទៅលើភូមិមួយ ក្នុងរដ្ឋ North Kordofan ភាគខាងលិចប្រទេសស៊ូដង់។

បណ្តាញវេជ្ជបណ្ឌិតស៊ូដង់ ដែលជាក្រុមស្ម័គ្រចិត្ត បាននិយាយនៅក្នុងសេចក្តីថ្លែងការណ៍មួយថា៖«កាលពីល្ងាចថ្ងៃព្រហស្បតិ៍ កងកម្លាំងយោធាប៉ារ៉ាគាំទ្ររហ័ស (RSF) បានវាយប្រហារទៅលើភូមិ Markaz Al-Ziyadiya ក្នុងរដ្ឋ North Kordofan ដែលបានបណ្តាលឲ្យមនុស្ស ៦នាក់ បាត់ខ្លួនផងដែរ។

បណ្តាញនេះ បានថ្កោលទោសអ្វីដែលខ្លួនបានពិពណ៌នាថា ជា «ការវាយប្រហារដ៏ឃោរឃៅ» ដោយបញ្ជាក់ថា វាបង្កើតជា «ឧក្រិដ្ឋកម្មសង្រ្គាម» ពេញលេញ និងឆ្លុះបញ្ចាំងពីគំរូជាប្រព័ន្ធដោយកងកម្លាំង RSF ដែលបានកំណត់គោលដៅជនស៊ីវិល នៅក្នុងប្រទេសស៊ូដង់។

សម្រាប់ផ្នែករបស់ខ្លួន គណៈកម្មាធិការសម្របសម្រួលនៃក្រុមតស៊ូ នៅរដ្ឋ North Kordofan ដែលជាក្រុមស្ម័គ្រចិត្តមួយផងដែរ បានបញ្ជាក់នៅក្នុងសេចក្តីថ្លែងការណ៍មួយថា ជនស៊ីវិល ១៦នាក់ ត្រូវបានសម្លាប់នៅក្នុងការវាយប្រហាររបស់កងកម្លាំង RSF លើភូមិ Markaz Al-Ziyadiya ដោយបានបញ្ជាក់ថា មនុស្សជាច្រើននាក់ផ្សេងទៀត បានរងរបួស ឬត្រូវបានចាប់ខ្លួន។