គណៈកម្មាធិការថ្នាក់រដ្ឋមន្ត្រីអារ៉ាប់ទទួលបន្ទុកដោះស្រាយជម្លោះហ្កាហ្សា បាននិយាយនៅថ្ងៃសៅរ៍ថា ខ្លួនបានឲ្យអ៊ីស្រាអែលទទួលខុសត្រូវទាំងស្រុងចំពោះឧក្រិដ្ឋកម្មប្រល័យពូជសាសន៍ប្រឆាំងនឹងជនស៊ីវិលប៉ាឡេស្ទីន នៅតំបន់ហ្កាហ្សា។

សេចក្តីថ្លែងការណ៍ដែលចេញដោយរដ្ឋមន្ត្រីដែលចូលរួមកិច្ចប្រជុំកំពូលអារ៉ាប-អ៊ីស្លាមវិសាមញ្ញរួមស្តីពីការវិវឌ្ឍ នៅក្នុងតំបន់ហ្កាហ្សា បានឲ្យដឹងថា៖«យើងបានឲ្យអ៊ីស្រាអែលទទួលខុសត្រូវទាំងស្រុងចំពោះអំពើប្រល័យពូជសាសន៍ ដែលកំពុងបន្ត និងគ្រោះមហន្តរាយមនុស្សធម៌ដែលមិនធ្លាប់មានពីមុនមក ដែលកើតឡើងនៅក្នុងតំបន់ហ្កាហ្សាស្ទ្រីប»។  

គណៈកម្មាធិការនេះ បានអំពាវនាវដល់សហគមន៍អន្តរជាតិ ជាពិសេសសមាជិកអចិន្ត្រៃយ៍នៃក្រុមប្រឹក្សាសន្តិសុខ ឲ្យចាត់វិធានការជាបន្ទាន់ ដើម្បីបញ្ឈប់គោលនយោបាយឈ្លានពានខុសច្បាប់របស់អ៊ីស្រាអែល។

គណៈកម្មាធិការក៏បានជំរុញឲ្យ «ការបញ្ឈប់ជាបន្ទាន់ និងទូលំទូលាយនៃការឈ្លានពានរបស់អ៊ីស្រាអែលប្រឆាំងនឹងតំបន់ហ្កាហ្សាស្ទ្រីប និងការបញ្ចប់ការរំលោភដែលកំពុងបន្តប្រព្រឹត្តដោយកងកម្លាំងកាន់កាប់ប្រឆាំងនឹងជនស៊ីវិល និងហេដ្ឋារចនាសម្ព័ន្ធស៊ីវិល នៅក្នុងតំបន់ហ្កាហ្សាស្ទ្រីប វេសបែង និងទីក្រុងហ្ស៊េរុយសាឡឹមខាងកើត»។