​រុស្ស៊ី៖ អ្នកនាំពាក្យ​ប្រធានាធិបតី​រុស្ស៊ី​លោក Vladimir Putin បាន​និយាយ​កាលពី​ថ្ងៃអាទិត្យ​ថា រុស្ស៊ី​បានចាប់ផ្តើម​បង្កើន​កងកម្លាំង​យោធារ​បស់​ខ្លួន​នៅតាម​ព្រំដែន​អ៊ុយ​ក្រែ​ន ព្រោះ​ខ្លួន​មិនអាចទ្រាំ​នឹង​ការពង្រីក​ខ្លួន​ចូលទៅ​តំបន់​ខាងកើត​របស់​អង្គការ​ NATO និងការឈ្លានពាន​បន្តិច​ម្តងៗរបស់​អ៊ុយ​ក្រែ​ន​ទៀត​ទេ​។ ​កងកម្លាំង​រដ្ឋាភិបាល​អ៊ុយ​ក្រែ​នបានធ្វើ​សមយុទ្ធ​ នៅក្នុង​ភាគ​ខាងកើត​របស់ខ្លួន​កាលពី​ថ្ងៃ​ព្រហស្បតិ៍ ​ស្របពេល​មាន​ភាព​តានតឹង​នៅតាម​ព្រំដែន​ជាមួយ​រុស្ស៊ី។​

​ក្នុង​ពេល​បង្ហាញខ្លួន​នៅក្នុង​កម្មវិធី​ "Fareed Zakaria GPS" លើ​កញ្ចក់​ទូរទស្សន៍ CNN អ្នកនាំពាក្យ​របស់លោក Putin គឺ​លោក Dmitry Peskov បាន​និយាយថា ដំណាក់កាល​សម្រាប់​វិបត្តិ​ព្រំដែន​បច្ចុប្បន្ន​ ត្រូវបាន​កំណត់​កាលពី​ប៉ុន្មាន​ទសវត្សរ៍​មុនគឺ​នៅក្នុង​ទសវត្សរ៍១៩៩០​។ ទាហាន​រុស្ស៊ី​ប្រហែល ១០០,០០០នាក់​ថ្មីៗ​នេះ​បាន​ប្រមូលផ្តុំ​នៅ​ជិត​ប្រទេស​អ៊ុយ​ក្រែ​ន ដែលនាំឱ្យ​មានការ​ព្រួយបារម្ភ​ថា​ រុស្ស៊ី​នឹង​ឈ្លានពាន​ប្រទេសជិតខាង​ក្នុងពេល​ឆាប់ៗ​នេះ​។​ ​លោក Peskov បាន​និយាយ​កាលពី​ថ្ងៃអាទិត្យ​ថា នៅពេលដែល​ប្រទេស​អាល្លឺម៉ង់​ត្រូវបាន​បង្រួបបង្រួម​ឡើងវិញ នៅពេលនោះ​សហភាពសូវៀត និង​មេដឹកនាំ​សហភាពសូវៀតគឺលោក Mikhail Gorbachev បាន​និយាយថា ​លោក​ឯកភាព​ចំពោះ​រឿង​នោះមានការ​សន្យា​ដោយ​ភាគី​អាមេរិក។

​លោក​បាន​បន្តទៀតថា គួរ​ឲ្យ​ស្ដាយបញ្ហា​នោះ​មិន​ត្រូវបាន​ផ្សះផ្សា​នៅក្នុង​តុលាការ​ នៅក្នុង​ឯកសារ​ធានា​ដែល​ជាប់​កាតព្វកិច្ច​ផ្លូវច្បាប់​នោះទេ ប៉ុន្តែ​វា​មានការ​ធានាថា NATO នឹងមិន​ពង្រីក​ឥទ្ធិពល​ហេដ្ឋារចនាសម្ព័ន្ធ​យោធា ឬហេដ្ឋារចនាសម្ព័ន្ធ​នយោបាយឆ្ពោះទៅកាន់​តំបន់​ភាគ​ខាងកើត​នោះទេ​។ ​លោក​បន្ថែមថា ពិតជា​គួរ​ឲ្យ​សោកស្ដាយ​ខ្លាំងណាស់ ចាប់តាំងពី​ពេលនោះ​មករឿង​ផ្ទុយគ្នា​ជាច្រើន​បានកើតឡើង ហើយហេដ្ឋារចនាសម្ព័ន្ធ​យោធារបស់​អង្គការ NATO បានចាប់ផ្ដើម​រំកិល​ចូលកាន់​តែ​ជិតព្រំដែន​នានា​របស់​សហព័ន្ធរុស្ស៊ី។ លោ​ក​ថា ​ចំណាត់ការ​ថ្មីៗ​របស់​យោធា​ដឹកនាំ​ដោយ​សហរដ្ឋអាមេរិក ធ្វើ​ឲ្យ​រុស្ស៊ី​មាន​អារម្មណ៍​ថា ​សន្តិសុខ​ជាតិ​របស់ខ្លួនកំពុង​ស្ថិតក្នុង​គ្រោះថ្នាក់​៕

អត្ថបទ៖ សុខមាន