សារព័ត៌មាន Financial Times (FT) បានរាយការណ៍នៅថ្ងៃអាទិត្យ (១០ សីហា) នេះថា ប្រទេសចិន ចង់ឱ្យសហរដ្ឋអាមេរិក បន្ធូរបន្ថយការគ្រប់គ្រងរបស់ខ្លួនលើការនាំចេញផលិតផលបន្ទះឈីបដ៏មានសារៈសំខាន់សម្រាប់បញ្ញាសិប្បនិម្មិត AI ដើម្បីជាផ្នែកមួយនៃកិច្ចព្រមព្រៀងពាណិជ្ជកម្មរវាងភាគីទាំងពីរ មុនពេលកិច្ចប្រជុំកំពូលដែលអាចធ្វើទៅបានរវាងលោកប្រធានាធិបតីអាមេរិក Donald Trump និងសមភាគីចិន លោក Xi Jinping ។

FT បានរាយការណ៍ដោយដកស្រង់សម្តីប្រភពដែលដឹងពីបញ្ហានេះថា ក្រុមមន្ត្រីចិន បានប្រាប់អ្នកជំនាញនៅទីក្រុងវ៉ាស៊ីនតោនថា ទីក្រុងប៉េកាំងចង់ឱ្យរដ្ឋបាលលោក Trump បន្ធូរបន្ថយការរឹតបន្តឹងរបស់ខ្លួនលើការនាំចេញលើបន្ទះឈីបអង្គចងចាំមានកម្រិតបញ្ជូនខ្ពស់ឈ្មោះថា HBM។ គួរឱ្យដឹងថា បន្ទះឈីប HBM ទាំងនោះអាចជួយបំពេញកិច្ចការ AI ដែលពឹងផ្អែកទៅលើទិន្នន័យបានយ៉ាងឆាប់រហ័ស ហើយត្រូវឃ្លាំមើលយ៉ាងដិតដល់ដោយវិនិយោគិនសកល ដោយសារតែការប្រើប្រាស់ដ៏សំខាន់របស់ HBM ជាមួយនឹងប្រព័ន្ធដំណើរការក្រាហ្វិក AI ជាពិសេសក្រុមហ៊ុនបច្ចេកវិទ្យាខ្នាតយក្ស Nvidia។

កាសែត FT និយាយថា ចិនបារម្ភខ្លាំងដោយសារតែការគ្រប់គ្រង HBM របស់អាមេរិក អាចរារាំងសមត្ថភាពរបស់ក្រុមហ៊ុនចិន ដូចជា Huawei ជាដើម ទាក់ទងនឹងការអភិវឌ្ឍបន្ទះឈីប AI ផ្ទាល់ខ្លួនរបស់ពួកគេ។ រដ្ឋបាលអាមេរិកជាបន្តបន្ទាប់ បានទប់ស្កាត់ការនាំចេញបន្ទះសៀគ្វីទំនើបបែបនេះទៅកាន់ប្រទេសចិន ដោយសម្លឹងមើលការរារាំង AI និងការអភិវឌ្ឍវិស័យការពារជាតិដែលចេះតែកើនឡើងរបស់ទីក្រុងប៉េកាំង៕